Múte tunngaviusumik isumaqatigiissut pillugu ammasumik isumasioqatigiittoqarnissaanik piumasaqartoq
Naalakkersuisut Kangerlussuarmi timmisartoqarfik pillugu illersornissamut ministerimik Trine Bramsenimik sunik isumaqatigiissuteqarsimanerannik nalornissuteqarneq Aningaasaqarnermut Ataatsimiititaliami ammasumik isumasioqatigiittoqarnissaanik piumasaqarnermik nassataqarpoq
Múte B. Egede IA-meersoq isumaqarpoq, susassaqartut sorpianik isumaqatigiissuteqarsimanersut paasisaqarfigineqarnissaa piffissanngortoq, susassaqartummi tamamik immikkut tunngaviusumik isumaqatigiissumi aningaasaqarnermut tunngassuteqartut pillugit assigiinngitsunik oqalupput: Kangerlussuarmi timmisartoqarfiup inuinnarnut ammatinneqarnera kikkut akilissavaat.
- Inatsisartut minnerunngitsumillu innuttaasut ataqatigiinngitsunik paasissutissinneqarsimapput. Innuttaasut eqqortumik paasissutissinneqartariaqalerput. Taamaammat piumasaraara, ataatsimiititaliami suleriaasitsinni §19, imm. 4 naapertorlugu suliamut atatillugu Naalakkersuisoq ammasumik isumasioqatigiinnissamut piaartumik aggersarneqassasoq, oplyser IA-p siulittaasua ilisimatitsivoq, tassungalu atatillugu allaaserisat arlallit KNR-ip Sermitsiaq.AG-llu saqqummiussimasaat innersuussutigalugit.