Aningaaserivimmi pisortaq: Politikkikkut siunnerfik nutaaq pisariaqarpoq

Aalisarnermi politikki eqqarsaatigalugu politikerit nutaamik siunnerfeqartariaqalerput. Aalisartut isertitaqartuarnissaat anguniarlugu biologit innersuussutaat qaangertuarlugit pisasseeqqittuarnerit akilersinnaanngillat. Grønlandsbankenip pisortaa Martin Kviesgaard taama ersaritsigisumik oqarpoq.

Bankdirektør Martin Kviesgaard mener, at "vi er ved at se et økonomisk kollaps".

Aningaaserivimmi pisortaq, Martin Kviesgaard, Grønlandsbanken, nunatsinni politikerit Naalakkersuisullu nalinginnaanngitsumik sakkortungaatsiartumik kaammattorpai. Taama kaammattuivoq nunatsinni aalisartut aningaasaliiffigisarunnaarniarlugit aningaaserivik aalajangereermat.

- Aalisarneq piujuaannartitsinissaq tunngavigalugu ingerlanneqartariaqarpoq, aningaaserivimmi pisortaq taama ersaritsigisumik oqariartuuteqarpoq.

Illersoruminaatsoq

Taanna isumaqarpoq aalisarneq piujuaannartitsinissaq tunngaviginagu ingerlanneqartoq, aningaaseriviup aningaasalersuinnassappagu, tamanna imminut illersoruminaatsuusoq.

- Taama iliuinnassagaluarutta, uagut Kalaallit Nunaallu, aningaaserivittut nunatullu naatsorsuutigineqarnerput malinnagu ingerlassagaluarpugut, Martin Kviesgaard Sermitsiaq.AG-mut erseqqissaavoq. Taama oqarnermini tikkuarpaa biologit innersuussutaat qaangerlugit aalisakkat pisassiissutigineqartut qaffanneqartuartut aalisarsinnaanermullu akuersissutillit amerlingaatsiarsimasut.

Taanna isumaqarpoq aalisarnerup iluani MSC-mik meqqilersuineq annertunerusoq pisariaqartoq, tamannalu piujuaannartitsinissaq tunngavigalugu, FN-ip SDG-imi anguniagai malillugit, Kalaallit Nunaata aalisarneranut tulluarnerussagaluartoq.

Aningaasaqarneq ajalusoorsinnaasoq

- Kalaallit Nunaat piujuaannartitsinissamik siunertaqanngitsutut tikkuarneqarnissaa aammalu aalisakkat milliartuinnarnerisa kingunerisaanik aningaasaqarnerup ajalusoornissaa, ernummatigaakka. Unittariaqarpugut, Martin Kviesgaard oqarpoq.

- Umiatsiaararsorluni aalisarneq eqqarsaatigalugu aalisarnermi politikkip allanngortinneqarnissaa aningaaseriviup soorunami neriuutigaa, aalisartut pikkorissut atuisugullu pitsaasut aningaasaliiffigeqqittalerniassagatsigit, Martin Kviesgaard oqarpoq.

Powered by Labrador CMS