Siunnersuuterpassuit kinguartinneqartut unitsiinnarneqartulluunniit
Ukiakkut ataatsimiinnermi oqaluuserisassat qulit kinguartinneqarsimapput siunnersuuteqartunilluunniit unitsiinnarneqarsimallutik
Inatsisartut Allattoqarfiat ukiaq manna ataatsimiinnermi ullunik ataatsimiiffissanik oqaluuserisassanillu allanngortiteraluni ulapputeqarpoq.
Oqaluuserisassat ”oqimaatsut” arlallit kinguartinneqarsimapput. Taamaalilluni uumasunut nakorsaqarnermut inuussutissalerinermullu oqartussaaffimmik angerlaassinissaq pillugu aalajangiiffigisassatut siunnersuut novembarip arfernani aappassaanik suliarineqartussanngorlugu kinguartinneqarsimavoq.
Utoqqalinersiat pillugit Inatsisartut inatsisaata allanngortinneqarnera pillugu Inatsisartut inatsisissaattut siunnersuut, utoqqalinersiallit utoqqalinersiutiminnik ilanngaaffigineqanngikkaluarlutik, utoqqalinersiutimi saniatigut qanoq annertutigisumik isertitaqarsinnaanerannik aalajangersaasussaq, ILaqutariinnermut Peqqissutsimullu Ataatsimiititaliap qinnuiginneratigut novembarip arfineq-aappaanni aamma 14-iani suliarisassanngortinneqarpoq.
Aalajangiiffigisassatut siunnersuutit marluk taamaatiinnarneqartut
Aalajangiiffigisassatut siunnersuutit marluk siunnersuuteqartut qinnuiginneriisigut taamaatiinnarneqarsimapput, siunnersuuteqartut Naalakkersuisut akissuteqaataannik atuarsimallutik siunnersuutip akuerineqarsinnaanera upperiunnaarsimagamikku.
Aamma niueqatigiinneq siammasinnerusoq, nunanut allanut ammanerusoq, imaatigullu assartuussinissamik attaveqaasersorneqartoq qanoq isilluta pilersinneqassanersoq pillugu siunissami niuernikkut nunarsuarmioqataajartornermut aqqut atorlugu apeqquteqaat aallaavigalugu oqallisissiaq ilaatinneqassanngilaq.