Nuuk Nordisk Kulturfestivalimi inuunermit oqaluttuat tusarnaakkit

Nunatta Isiginnaartitsisarfiata suliniut nutaaq, oqaluttuat illuaraat, Nuummi ammarpaat.

Tamatumunnga tunngaviuvoq, isiginnaartitsisarfiup Nuuk Nordisk Festivalertoqarnerani Kalaallit Nunaanni Inuunermit oqaluttuartitsisut suleqatigalugit tusarnaagassiorsimanera. Sapaatiuppat tungaanut inuunnermit oqaluttuat tusarnaarneqarsinnaapput, aamma oqaluttuat illuaraanni nammineq misigisimasanik oqaluttuartoqarsinnaavoq, Iben Danielsen aamma Annelise Mølvig.

Kalaallit Nunaanni inuunermit oqaluttuartitsisut aamma Nuummiipput GUX Nuuk suleqatiginiarlugu. 3.S, oqaluttuartarneq taamalu tusarnaagassiortarneq pillugit ilinniassapput. Ippassaq aallartipput, maannalu namminneq inuunertik aallaavigalugu tusarnaagassiornissamut pilersaarusiorput, apersuipput tusarnaagassiorlutillu.

Isiginnaartitsisarfiup inersuaani tusarnaarneq

Kalaallit Nunaanni inuunermit oqaluttuat Nunatta Isiginnaartitsisarfiata inersuaani Nuummiittumi oqaluttuat illuaraanni oqaluttuarineqartut tusarnaarteqqaassavaat. Inunnermit oqaluttuat 38-usut ilaat, katersorneqareersimasut aamma Kalaallit Nunaanni Inuunermit oqaluttuat aallakaatinneqareersimasut tassani tusarnaarneqarsinnaapput. Peqatigitillugu tusagassiortut taakku marluk oqaluttuat illuaraanni inuit oqaluttuaannik tusarnaarnissamut piareeqqapput.

Inuunermi angorusutat oqaluttuarikkit

- Neriuutigaarput, inuit aggerlutik inuunerminnik oqaluttuassasut, aamma siunissami sunik angorusutaqarnerminnik oqaluttuassasut, oqarpoq Annelise Mølvig, nangillunilu oqaatigalugu, tusagassiortut marluk taakku apersuinissamut, immiussinissamut oqaluttuarineqartumillu saqqummiussinissamut piareeqqasut, soorlu aamma oqaluttuartunik assiliinissaminnut piareeqqasut.

Nunatta Isiginnaartitsisarfiani oqaluttuat illuaraat ulluni ukunani ammaqqissaaq:

Tallimanngorneq ulloq 11.10: nal. 17-19

Arfininngorneq ulloq 12.10: nal. 15-17

Sapaat ulloq 13.10: nal. 15-17

- Tusarnaagassiortarneq ukiuni makkunani nuannanerineqaqaat, taammaammat Kalaallit Nunaanni Inuunermit oqaluttuartitsisartut inersuatsinnut aggersarsimavavut, Nunatta Isiginnaartitsisarfiani pisortaq Susanne Andreassen oqarpoq.

Inuusuttut inuunerminni naapittarsimasaminnik oqaluttuartut

Kalaallit Nunaanni inuunermit oqaluttuarineqartut ilaat inuusuttunit GUX Sisimiuneersunit kiisalu Nuuk Internationale Friskolemi atuartunit oqaluttuarinqarput. Taakku ilaqqutaminnut soqutigisaminnullu tunngassuteqartunik, aamma siunissamut tunngatillugu eqqarsaatiminnik oqaluttuarput.

Tamatumuuna GUX Nuummi 3. S-imi atuartut namminneq inuunertik aallaavigalugu tusarnaagassiussapput.

- Danskisut atuartuutikka Kalaallit Nunaanni Inuunermit oqaluttuanut tusarnaagassiortussatut ilanngutsissimavakka, takusinnaangakku klassimi atuarfiusumut sanilliullugu danskisut oqalunnerunissaannut manna periarfissatsialaasoq, klassimi danskisut ilinniartitsisoq Marianne Elsborg oqarpoq, nangillunilu oqaluttuaralugu, klassimi atuarfiusumi oqaluuserineqakkajunnerusartut ilinniagassatut pilersaarutit ilinniakkamut atatillugu aalajangersarneqarsiasut, atuartullu sammisamut attuumassuteqanngitsutut imminnullu attuumassuteqanngitsutut isigisartagaat.

Kikkut tamarmik oqaluttuassaqarput

Atuartut sumik sammisaqassanerlutik namminneq aalajangissavaat. Ulluinnarni atugaannut tunngassuteqarsinnaapput imaluunniit soqutigisaannut tunngassuteqarsinnaapput.

-Atuartut suna pineqarnersoq paasipallappaat, namminnerlu oqaluttuassatut isumassarsiatik, ukiakkut atuanngiffeqarnermi suliassatik saqqummiullugit. Arlallit ilinniartitaanermut siunissamullu tunngassuteqartut, Nuummilu inuusuttuulluni qanoq innersoq pillugu suliarissallugit aalajangersimavaat. Allat meeraanerminni pisimasut, illoqarfiit nunaqarfiillu inuuffigalugit assigiinngissusaat imaluunniit arsaattarnermut tunngassuteqartut oqaluttuaraat, Iben Daielsen oqaluttuarpoq.

-Sapaatip akunnerata tulliani atuartut immiussimasaat sammissavavut, aaqqissuutissavavut tusarnaagassiaralugillu. Atuarfimmit neriorsuutigineqarsimavoq, sisamanngorpat tusarnaartitseqqaartoqassasoq, aamma Kalaallit Nunaanni Inuunermit oqaluttuat Facebookikkut nittartagaatigut tusarnaartarfinnilu tusarnaarneqarsinnaassapput. Tusarnagassiat naammassillugit suliarineqarsimasut tusarnaarnissaannut qilanaarpugut, Annelise Mølvig oqarpoq.

- Tassa sumut sammivilimmik suliaqassanerlutik namminneq aalajangissavaat. Neriuutigaara, sammisaminnut soqutiginninnermikkut oqaluttariarsornikkut aporfigisartakkatik qaagissagaat, aamma neriuutigaara tamarmik oqaluttuassatsialaqassasut. Tamattami oqaluttuassaqartarpugut oqaaseqarnissamut periarfisssinneqaraangatta, Marianne Elsborg GUX Nuummeersoq oqarpoq.