Demokraatit Sermersuumi ingerlatsivimmik isornartorsiuisut

- Pingaarnersiuinerit paasisinnaanngilavut, aamma taamatut kukkusumik missingersuusiortarnerit qanoq qaqugukkullu qaangerniarneqarnissaannut iliuusissatut pilersaarusiortoqartariaqarpoq, Anna Wangenheim, Kommuneqarfik Sermersuup Kitaani Demokraatini siulittaasoq tusagassiorfinnut nalunaaruteqarnermini oqarpoq.

Kommunalbestyrelsip kingullermik ataatsimiinnerani politikkerit ulloq unnuarlu paaqqinnittarfeqarnermut 25 millioner koruuninik aningaasaliissuteqaqqittoqarnissaanut akuersisimanerat pillugu Sermitsiaq.AG-p saqqummiussaqarnerata kingorna isornartorsiuisoqarpoq.

Susassaqarfik taamaalilluni 225 millioner koruunit angullugit aningaasaliiffigineqarpoq.

- Meeqqat pisariaqartitsisut ikiorneqarnissaannik tunngavilersuisarneq inissaminiippoq, katillugilli 15 millioner koruuninik sipaaruteqartoqarnissaanik neriuuteqarsimagaanni ukiut arlallit tulleriiginnarlugit aningaasaliissuteqaqqittarneq siuttut anguniagaqanngitsutut akisussaassuseqanngitsutullu inissisimapput.

Aquttut suliniutissanik ingerlaannaq nassaarniartariaqarput aamma sipaaruteqarnissamik kiisalu ulloq unnuarlu paaqqinnittarfinnut inissiisarnerit amerliartortut pinaveersaartinneqarnissaannik anguniakkat anguniarlugit aquttut kommunalbestyrelsimik

suleqateqartariaqarput, siunnersuuteqarpoq Anna Wangenheim, “kommunimi allaffissornerujussuaq atuutereeraluartoq” kommunaldirektørip tulliatut atorfimmik pilersitsisimanermut tupigusuuteqartoq.

Politikkerit ilisimatinneqarsimappat?

Taassuma atorfik inuttassarsiuunneqartoq pillugu allaffissornermullu aningaasartuuteqarneruleriartorneq pillugu kommunalbestyrelsi ilisimatinneqarsimanersoq apeqquserpaa.

- Sermitsiaq.AG-p sapaatip akunnerani matumani ilanngutassiaani saqqummiunneqarpoq, inuusuttut paaqqinnittarfimmit anisussat pillugit suleqatigiittoqarsinnaannginnera pissutigalugu sipaaruteqarnissamik pilersaarut naammassineqarsimanngitsoq.

Aamma akisussaassuseqartoqannginnera Sermersuup Kitaani Demokraatit tupiguusutigingaat, tusagassiorfinnut nalunaarummi allassimavoq.

- Aqutsisut akisussaaffigaat, unammilligassanik sukkulluunniit atuuttunik qulaajaanissaq aamma atugassarititaasut aallaavigalugit unammilligassanik aaqqiissuteqarnissaq. Taamaammat aquttunut ajornanngippallaaqaaq suleqatigiinniarnermik ajonartorsiuteqartoqarnerarlugu oqaannassalluni, pisariaqartinneqartumimmi suleqatigiittoqarnissaa aqutsisut akisussaaffigaat, erseqqissaavoq Anna Wangenheim.

Demokratit nunap immikkoortuani siulittaasuata kaammattuutigaa, allaffissornermut aningaasartuutaasartut ikilisinneqassasut, aamma ulloq unnuarlu paaqqinnittarfinnut inissiisarnerit pitsaaliorneqarnissaannut aningaasat pisariaqartinneqartut atoneqartassasut.

Uungaaraannannguaq isigaluni eqqarsartarneq unitsinneqarli

- Uungaaraannannguaq isigaluni eqqarsartarneq unitsikkusupparput aamma ulloq unnuarlu paaqqinnittarfinnut inissiisarnerit ikinnerpaaffimminniitinneqarnissaannik ataatsimut anguniaqarneq pillugu qanimut suleqafigiittoqartarnissaa kissaatigaarput. Aamma meeqqat pineqartut sumit aggernerssut pillugit nalunaarusiortoqartassaaq, kommuninillu allanit aggersuuppata kommuni aningaasatigut immikkut artukkerniarnagu innutaasunut/ilaqutariinnut ataasiakkaanut aningaasat malinnaatinneqartassapput. Tulliullugu aqutsisut akisussaassuseqartuunissaat aamma piviusorsiornerusumik missingersuusiortoqartarnissaa anguniagaasariaqarput. Kommunalbestyrelsi unammilligassanut taamak pingaaruteqartigisunut aalajangeeqataasariaqarpoq, erseqqissaavoq Anna Wangenheim.

Nutaarsiassat

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...