Danskit Kalaallit Nunaanni nerisassat akiinut quarsaartut
Danskit tupattarput qajuusat Kalaallit Nunaanni 25 koruuninik akeqartut tusaraangamikku
- Neriuppunga kalaallit puisit naavinit vitamininik pissarsisinnaassasut, Kalaallit Nunaannimi naatitat akisoorujussuupput. Aarhusimi Food Festivalertoqarnerani Arctic Street Foodip Aalborgimeersup tupermi kalaallit nerisassaataannik tuniniaanerani taamak nipilimmik oqartoqartarpoq.
Isumassarsiaq ajornaatsunnguuvoq. Arctic Street Foodimi sulisut pisiniarfeerannguaq inuussutissanik pisariaqartinneqarnerpaasunik tuniniaaffissatut aaqqissuussimavaat (soorunami aamma nagguteeqqat kaffilu Araba ilanngullugit) pisiassallu kalaallit akigititaannik akeqartillugit saqqummiussimallugit.
Danskit atuisut akigititat uppererpasinnagit, annilaarlutik, mamiatsallutik nalliginnillutillu takusarsimavaat. Qajuusat 2 kiilut 24,95 koruunillit atuisunut nioqqutissamut tassunga nalinginnaasumik 10 koruunimik akiliisartunut tupannarsimaqaat.
Marloriaammik akillit
- Tusarnikuugaluarpara, taamalli akisutiginerat annilaarutigaara. Danmarkimili akigititat marloriaataat sinnerlugit akeqarput, oqaluttuarpoq Gerd Møller Aarhusimeersoq, soraarninngorsimasoq ileqaarisartorlu.
- Oqaluttuukkamalu kalaallit soraarnerussutisiaat Danmarkimut sanilliullugu aamma appasinnerusut, aatsaat iluamik paasiuminaatsippara. Kalaallit Nunaanni inuuniarneq oqimaassimassaqaaq, ilanngullugu oqaatigaa.
Gerd Møllerip ikinngutaa, Anna Makra, taamak annilaarsimatiginngilaq.
- Norgemi Islandimilu aamma taamak akisutigipput. Tamanna eqqortuusinnaanngilaq – meeqqallu peqqinnartunik nerisaqartinniarnerat ajornakusoorsimassaqaaq, taamak taanna isumaqarpoq.
Aaqqiissutissatut siunnersuuterpassuit
Food Festivalimi kalaallit tuperisaanni pisiniarfeeraq ornigarneqarluarpoq – pulaartorpassuillu akornanni akit ajornartorsiutigineqarnerannut aaqqiissutaasinnaasunik siunnersuuterpassuaqartoqarpoq. Kalaallit Nunaanni inuussutissanut naalagaaffiup tapiissuteqartarnissaa ilaannit piumaneqarpoq, allat Kalaallit Nunaanni naatitanik naatitsisoqarsinnaanersoq soqutigivaat, arlalippassuit meeqqat nerisassaat ernummatigivaat – kiisalu allat isumaqarput puisit naavini vitaminerpassuaqartoq.
- Danskit Kalaallit Nunaannut tunngatillugu ilisimaqarnerulersikkuvuppavut, matumanilu eqquilluarsimavugut, oqaluttuarpoq Lisbeth Døssing Aalborgimi Kalaallit Illuaneersoq, Arctic Street Foodip saqqummersitsinerani ikiuussimasoq.
- Takuniaasut nalinginnaasumik ulluinnarsiutigisartagaat eqqorluarsimavarput - danskillu ilisimasaqarfigisaat tassaavoq ulluinnarni nerisassat akii. Kalaallit Nunanni ulluinnarni pissutsit oqaluttuarissagaanni tamanna tunngaviulluarsinnaavoq, taamaammat qisuariaatigineqartut naammagisimaarluarpavut, oqarpoq Lisbeth Døssing.