Nunap ataa qulaajarneqassaaq
Naalakkersuisut aatsitassarsiornermut isumalioqatigiissitamik 2020-21-mi pilersitsiniarput.
Pinngortitami misissuinermi aasaq manna aamma Nunatsinni saffiugassanik ujaasineq annertuumik ingerlanneqarpoq: Avannaani Moriusamit Nunap Isua uiariarlugu avannaata kangianut Citronen Fjordi- mut.
Aviisi Sermitsiaq taama allappoq.
Naak ukiut siuliinut sanilliullugu aatsitassarsiortitseqatigiiffiit amerlanerusut ujaasinermik ingerlatsigaluartut, matuma allannerata nalaani nunarsuarmi qeqertat annersaanni piiaaffiit marluinnaat atuupput: Greenland Rubyp Qeqertarsuatsiaat eqqaanni rubinimik piiaaffiani aamma Hudson Greenlandip anorthositimik piiaaffiani Kangerlussuup eqqaaniittumi, uuliamilli ujaasineq ukiorpassuit ingerlaneranni aatsaat taama ingerlanneqanngitsigaluni.
Namminersorlutik Oqartussat aatsitassarsiornermut tunngasut akisussaaffinnut tigusassani siullertut januaarip aallaqqaataanni 2010-mi tiguaat, minnerunngitsumilli piiaaffissatut pilersaarutit angisuut marluk Kujataaniittut, tassa Killavaat Alannguanniittoq aamma Kuannersuarniittoq naalakkersuisoqatigiit nikerartut ukiuni qulinngulersuni piiaanissamut periaasissamik atasinnaassusilimmik pilersitsiniarnertik ajornakusoortissimaqaat.
Sulisitsisut 2014-imi ukioq mannalu Nunatta Aningaasaqarneranut Siunnersuisoqatigiivi assigalugit innersuussutigaat, Naalakkersuisut uuliamik aatsitassanillu ujaasisunit peqataaffigineqartumik ataavartumik aamma arlaannaannulluunniit attuumassuteqanngitsumik atsitassarsiornermut siunnersuisoqatigiinnik pilersitseqqullugit.
Innersuussutigineqartorli piviusunngortikkuminaassimavoq; tamatumani minnerunngitsumik aatsitassarsiornermut naalakkersuisuusartut nikerarnerujussuat pissutigalugu.
Inatsisinut tunngasut paasilluarneqartut
Maannali piviusunngortinneqartussanngorpoq.
Naalakkersuisut aningaasanut inatsisissatut siunnersuutiminni aatsitassanut isumalioqatigiissitamik pilersitsinissamut 2020- 21-mi 3 millionit koruuninik immikkoortitsiniarput, taakkulu aatsitassarsiornermut inatsimmut innersuussuteqartassallutik, taamaalilluni aatsitassarsiornermik ingerlatsisut aamma aningaasaliisartut Nunatsinni nunap iluaniittunut soqutiginninnerulerniassammata.
Aviisimi Sermitsiami, uani ataani pissarsiarisinnaasarni, atuarnerusinnaavutit: