Aningaasanut inatsisissatut siunnersuut taamaatsillugu Mútep itigartippaa

Nunatsinni partiit illuatungiliuttut annersaat IA tupaallatsinneqarpoq aningaasanut inatsisissatut siunnersuummik, partii malillugu, taamak annertutigisumik inuit ulluinnarni atugaannik pitsaanngitsumik kinguneqartussamik Naalakkersuisut saqqummiussisinnaammata

IA siusinnerusukkut nalunaareerniatatillugu isumaqatigiissuteqartoqassappat peqataasinnaalluni, innuttaasut ulluinnarni inuuniarnerannut pitsanngoriaatissat siunnerfigineqassappata.

Aviisi Sermitsiaq taama allappoq.

Maannali naalakkersuisut siunnersuutaat sukumiisumik misissoreerlugu, partii assut isumakululersinneqarpoq aningaasaqarnikkut nunatta aqunneqarnera pillugu. Partiip siulittaasua, Múte Bourup Egede tassunga atatillugu erseqqissaavoq aningaasanut inatsisissatut maannakkutut isikkoqartillugu namminneq peqataanaviaratik:

- Aningaasanut inatsisissatut siunnersuut ullumikkut atukkanut aaqqiissutissanik tikkuaanngilaq siunissamullu tikkuussisuunani. Soorluuna Naalakkersuisut suli paasisimanngikkaat ullumikkut atukkatigut oqilisaasoqanngippat siunissami pitsanngortoqarani inissisimaffimmiiginnartoqartussaasoq ineriartortoqarnissaanullu qanillattuisoqarnaviarani. Tassami Naalakkersuisut takusinnaasagut malillugit innuttaasut atugarissaarnissaannik naammaginartumik qulakkeerinninniarsimanngillat, tamannalu assut isumakulunnarpoq, Múte Bourup Egede (IA) tikkuaavoq.

Inernissaa pinnersagaq

Múte Bourup Egede taamaalilluni inerniliivoq Naalakkersuisut eqqarsaatigilluagaanngitsunik pinnersaaniarsimasut sunaluunniit akigalugu. Ilaatigut innersuussutigaa Naalakkersuisut akinik akissarsianillu nalimmassaanissami periuseriniagaat, tassani takuneqarsinnaanerarpaa aningaasanut inatsisip inernissaata oqimaaqatigiissin neqarnissaa anguniarlugu ilaannakortumik kittaartumillu akit qaffakkiartornerannut iluarsiissuteqarniarsimasut, taamaaliornikkut aningaasanut inatsisissap inernissaa 50 millioner koruuninik pinnersarneqarniassammat, taamatulli iliorneq IA malillugu sipaarniarneruvoq innuttaasut ulluinnarni atugaannut annertuumik ajorseriaatissanik nassatalik, assersuutigiinnarlugu kommuninut ataatsimoortumik tapiissutit ilaannakortumik akit nalikilliartornerannut iluarsiissutissanik siunnerfeqarsimapput aamma peqqinnissaqarfimmi aserfallatsaaliinermut ingerlatsinermullu akit naleerukkiartornerannut iluarsiissutissat ilaannakortumik tunniunneqassasut siunniunneqarsimavoq (kalaallisuuani qupperneq 200).

Aviisimi Sermitsiami nutaami atuarnerusinnaavutit allaaserisanillu allanik atuarlutit. Aviisi uani ataani pissarsiarisinnaavat:

Powered by Labrador CMS