Timmisartuussinernut akitsuusersueriaaseq isornartorsiorneqarpoq

Akitsuusersueriaaseq nutaaq 'isumatusaarnerunngitsoq' Demokraatinit Justus Hansen isumaqarpoq.

- Avinngarusimasuni najugallit pisariaqanngitsumik eqqorneqarujussuassapput. Akitsuusersueriaaseq imminut naapertuutinngilluinnarpoq, Justus Hansen Sermitsiaq.AG-mut oqarpoq.

Naapertuutinngitsut arlaqartut

- Naapertuutinngitsut assigiinngitsut iluarsineqarnissaat neriuutigaara, oqarpoq. Paasisinnaanngilaa sooq ukiaanerani timmisartuussisarnerit akisunerulissanersut.

Akitsuusersueriaaseq maanna imaappoq, ukiakkut angalanerit akikinnerullutik, aasaanerani angalanerit akisunerullutik. Akitsuusersueriaaseq nutaaq atuutilerpat assigiimmik akitsuusersueriaaseqartoqalissaaq. Aamma nunanut allanut angalanernut akitsuutit annikillineqassapput.

Paasiuminaatsoq

Akitsuusersueriaaseq nutaaq ukiortaamit atuutilersussaq Partii Naleqqamit Pele Brobergimit paasiuminaatsinneqarpoq.

- Namminersorlutik Oqartussat suliffeqarfiutaat Mittarfeqarfiit sooq landskarsimut ukiumut 12 million koruuninik tapiissuteqartassava, ingerlatseqatigiiffik 12 million koruunit missaannik nalilimmik akitsuutinik qaffaassappat, Pele Broberg aperaaq.

- Ingerlatseqatigiiffimmi akitsuutit ingerlatseqatigiiffiup akiligassaanut naleqquttussaapput. Mittarfinnut assigiinngitsunut sooruna akiligassat tungaatigut naligiimmik ingerlasoqanngitsoq. Namminersorlutik Oqartussat pisussaavoq akiligassat matussusissallugit. Innuttaasut taama pillaannarneqarsinnaanngillat, Pele Broberg naqissusiivoq.

- Nunani allani qanoq iliuuseqartoqartarnersoq qimerloorneqarsimasoq oqaatigineqarpoq. Kisianni atukkat assigiinngillat. Timmisartukkut ilaallutik mikkallartariaqartussanut akitsuusersueriaasissaq eqquissaaq, taamaattumik allanngortinneqartariaqarpoq, Pele Broberg oqarpoq.

IA: Neriorsuutit eqquutsinneqanngillat

Ukiaanerani timmisartortussanut akitsuusersueriaasissaq eqquinerlussasoq IA-mit Aqqaluaq B. Egede isumaqarpoq.

- Silaannakkut inunnik assartuussineq akisunerulissanngitsoq partiip Siumup neriorsuutigeqattaarlugu oqaatigisartagaa maanna aamma malunnaatilimmik akinik qaffaavigineqassasoq Naalakkersuisut akuersissutigisimavaat. Malugalugu, nunatta avataanut nunatsinnullu angalaneq akinik sapinngisaq tamaat qaffaaviginaveersaarneqarsimammat. Tupinnaraluartumillu Naalakkersuisut akuerisimasaat tassaavoq ukiuunerani nunatsinni angallanneq akitigut qaffaavigineqarnissaa allaavigineqassasoq, allaat 55 procentimik akitsuut qaffanneqassasoq Naalakkersuisut akuerisimavaat, tusagassiutinut nalunaarummi oqarpoq.

Tassa aasaanerani nunatsinnut takornariarpassuit akitsuinermi matussuseeqataanissaat pinaveersaartinniarlugu nunatsinni innuttaasut kisimik akinik eqqornerlunneqarnissaat Naalakkersuisutigoortumik aalajangersarneqarsimavoq. Naalakkersuinikkut taamatut ingerlatsineq Inuit Ataqatigiinniit isumaqatiginngilluinnarparput. Nunatsinni innuttaasut kaasarfiinit aningaasanik tigooraaginnarneq tamaanga killeqartariaqarpoq, IA-p politikkikkut oqaaseqartartua naqissusiivoq.