Mittarfiit nungullarsimasut peqqussummik tunineqaratarsinnaasut

Kalaallit Nunaanni mittarfiit arlalitsigut nungullarsimammata, Mittarfeqarfiit atortutik illuutitillu pitsaassutsimut pisariaqartumut aaqqissinnaanngippatigit, silaannakkut angallannermi oqartussat nakkutilliinerulernissartik peqqussutinillu tunniussisalernissartik eqqarsaatersuutigaat.

Mittarfeqarfiit nunatsinni mittarfiutai atortutigut illuutitigullu nungullarsimanerujussui, silaannakkut angallannermi oqartussat ernumassutigaat.

2020-mut aningaasanut inatsisissatut siunnersuummi, Vittus Qujaukitsup qaammammi kingullermi tamanna atuarneqarsinnaavoq.

Sanaartornermi kinguussaaneq

Aningaasanut inatsisissatut siunnersuummi allassimavoq 2018-imi aamma 2019-imi Mittarfeqarfiit aningaasaqarnerannik annertunerusumik misissuisoqarsimasoq, tassanilu paasineqarluni suliffeqarfik aaqqissugaanikkut amigartoorfiusumik ingerlanneqartoq.

Aningaasaleeqqinnermik pisariaqartitsineq aamma isasoorsinnaanerit sukkasuumik suliarineqarnissaannut suna pisariaqartinneqarnersoq pillugu silaannakkut angallannermi oqartussanik Mittarfeqarfiit maanna oqaloqateqarput.

Mittarfeqarfiit 2019-imi aningaasaleeqqinnermut 20 milliuunit koruuninik aningaasalerneqarpoq, 2020-milu aningaasaleeqqinnermut 10 milliuunit koruuninik aningaasaliiffigineqassalluni. Aningaasalli katillugit 30 milliuunit koruuniusut ”suliassaqarfimmi pisariaqartumik pitsaassusissap qulakkeerneqarnissaanut naammanngitsut ”, aningaasanut inatsisissatut siunnersuummi allassimavoq.

Sillimaniarnermi aarlerinartoqartoq

- Taamaattumik Mittarfeqarfiit silaannakkut angallannermi oqartussanik oqaloqateqarnerisa nanginnerani tamatuma aningaasalersornissaa pillugu aalajangiisoqartussaassaaq, taamaalilluni Mittarfeqarfiit atortui Kalaallit Nunaanni silaannakkut angallannermut ingerlatsinikkut isumannaallisaanikkut aarlerinartuussanngippata, aningaasanut inatsisissatut siunnersuummi allassimavoq.

Powered by Labrador CMS