Siumumi akerliusoq Kim Kielsenimik suli tatiginnilinngilaq

Siumumi politikerit nuimanerit arfineq-marluusut oqaaseqartartuat, Anders Olsen, Sermitsiaq.AG-mut oqarpoq siulittaasumut tatiginnileqqinnissaq imaaliallaannangassaanngitsoq.

Anders Olsen, Siumumi ilaasortat arfineq-marluusut siulittaasuminnut Kim Kielsenimut tatiginnikkunnaarlutik nalunaaruteqarnikuusunut oqaaseqartartuusoq, Sermitsiaq.AG-mut oqarpoq siulittaasuminut suli tatiginnigani.

- Tatiginnikkunnaarsimagaanni imaaliallaannaq tatiginnileqqittoqarsinnaanngilaq, nassuiaavoq.

Immikkoortortani amerlanerussuteqarluartut siulittaasuminnik tapersersuinerat, ajorsarnertut isiginngilaa.

- Immikkoortortaqarfiit ersarinnerusumik oqaloqatiginnissinnaanerusumillu siulittaasoqarnissamik kissaateqarnerput ilalerpaat, Anders Olsen erseqqissaavoq.

Taassuma qilanaaraa “akerliusimasut” Siumut siulersuisuunerinut ataatsimiinnissaat. Inatsisartut ukiaanerani ataatsimiinnissaat septemberip 20-ani aallartittussaq sioqqullugu, illuatungeriit naaperiutigiissuteqarlutik ataatsimiissapput.

- Siulersuisuunernut suut naaperiutigineqassanersut suleqatigiissutiginiarneqarnersullu pillugit oqaaseqarusunngilanga, oqarpoq.

Allamik oqaaseqarsinnaanngitsoq

Taassuma ilisimatitsissutigaa immikkoortortaqarfiit siulersuisuunernut tusarniutitut akissutaat kisiisa iluminni oqaloqatigiissutigisimallugit.

Taamaammat Kim Kielsenip nalunaarutaa kingulleq, Siumut aasamut ataatsimeersualerpat Siumut siulittaasuattut qinigassanngorteqqinnissamik eqqarsaateqarnera, eqimattap oqaloqatigiissutigisimanngilaa.

Powered by Labrador CMS