Tillie isornartorsiuivoq: Inuusuttut inuunerat Naalakkersuisut ajortisilluinnarpaat
Niuernermik Ilinniarfimmi ilinniarfiit marluk taamaatiinnarneqarnerat Suleqatigiissitsisunit Tillie Martinussenimit paasiuminaatsinneqarpoq. - Ilinniarnerit salliutippagut salliutinngilagulluunniit?, aperaaq
- Inuusuttut inuunerat Naalakkersuisut ajortisilluinnarpaat, innuttaasut nunatsinnit qimarratsillugit kiisalu inuusuttut siunissaarutsinneqarlutik.
Inatsisartunut ilaasortaq Tillie Martinussen (Suleqatigiissitsisut) taama isummersorpoq, Niuernermik Ilinniarfimmi ilinniarfiit marluk unitsiinnarneqarneranut atatillugu atualertussaraluit aqqaneq marluk eqqugaapput.
Iliuuseqartoqarli
Naalakkersuisut ilinniartitaaneq pillugu anguniagaat isornartorsiorpai.
- Naalakkersuisut aningaasaliinngippata, oqarlutilli ajornartorsiortugut, Aningaasanut inatsimmi Kalaallit Airportsikkut milliardikkaanik aningaasaleeqqinnissamut piginnaatitsisoqarnera takusinnaagatsigu tupinnarpoq. Taamatut ingasattuliornq qaqugu inatsinneqassava? Naalakkersuisut taamatut tulleriinnilersuinermikkut pisortanit ikiorserneqartartut amerliartortipiloorpaat. Ilinniarfiit eqqartorneqartut aallartinneqarnissaat anguniarlugu aningaasanik nassaartoqartariaqarpoq, Tillie Martinussen oqarpoq.
- Pissutsinut takussutissaalluarpoq inuusuttut aningaasarnermik ilinniagaqartinnagit nunalluunniit tamalaat akornanni pissutsinik ilinniagaqartinnagit Majoriamut qinnuteqartunut aningaasartuuteqarpugut, pisortanit ikiorserneqartussaanngortippagut suliffissaaleqisunngortillugillu. Illoqarfimmut ilinniarfiusumut nuussinissap piareersarnera ilinniartullu inaannik pissarsinissaq ajornakusooreeraluaqisut sanaartornissaq Naalakkersuisut aamma pingaarnerutinngilaat, oqarpoq.
Inuusuttut eqqorneqassasut
- Quujassuarusunnarpoq aningaasaqarnermut ilinniarnernut aningaasat pineqarmata. Nassaartoqarsinnaanngitsoq. Tamannami inuusuttunut inuunerisalu sinnerannut kingunerluttussaavoq. Pisortat pissutsinik ajortunngortitsilluinnassappata sooq suliniuteqartoqassava. Suliffeqarfiugaluarpat, ilinniarnerugaluarpat kigutinulluunniit narlorsaataagaluarpat Namminersorlutik Oqartussani napasuliani maannakkut politikkikkut aqutsisut naatsorsuutigisinnaanngilagut. Sangujoraartumik politikkeqartoqarpoq imminnullu assortuuttunik politikkeqartoqarluni. Ilinniarnerit salliutippagut salliutinngilagulluunniit?, aperaaq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...