Lektori taamaatitsineq pillugu: Kingunera pitsaanerpaavoq
Apeqqutit aalajangersimasut pillugit USA-mik oqaloqateqarneq aallaqqaataaneerneqarsinnaasoq, Jon Rahbek-Clemmensen Forsvarsakademietimeersoq taama naliliivoq.
Donald Trumpip Danmarkimut tikeraarniarnerminik taamaatitsinera, danskit politikeriisa ajuallaatigalugu assuarigaat, Forsvarsakademietimi lektorip, Jon Rahbek-Clemmensenip taamaatitsineq iluaqutissatut isigaa.
- Piviusmik inernera pitsaanerpaavoq, pisut tamarmik politikkimut tunngatinneqaleramik, taanna Sermitsiaq.AG-mut oqarpoq.
- USA-p, Kalaallit Nunaata aamma Danmarkip pivisumik oqaluuseriniagaannut, Donald Trumpip Kalaallit Nunaata pisiariniarneranik isumassarsinera qalliivoq.
Trumpip tweeterunnaarnera pitsaasoq
USA- ukiup kingulliup ingerlanerani Kalaallit Nunaannut pitsaasaarniarnermik ingerlatsisimanera, Jon Rahbek-Clemmensenip oqaatigaa. Nuummi aallartitaqarfimmik ammaanissamut pilersaaruteqarnerup tamanna takutippaa, mittarfinnik sakkutuujunngitsunut sakkutuunullu atorneqarsinnaasunut aningaasaleerusussuseqarnerup, ambassadørip Carla Sandsip Kalaallit Nunaannut tikeraakulanerata kiisalu joint-committeemi ataatsimiinnerit aallarteqqinneqarnerisigut.
- Sammisat aalajangersimasut, soorlu mittarfiit, Kinap Kalaallit Nunaanni sunniuteqarnera aamma amerikamiut aningaasaliisinnaanerat pillugit oqaloqatigiinnerit aallaqqaataaneerneqarsinnaanngorput.
- Oqaloqatigiinneq maanna atorfilittatigut ingerlaqqissinnaanngorpoq, Trumpip aamma tweetertarnerata eqqartorneqarunnaarnera iluaqutaassaaq.
USAakileerusunngilaq
USA-p Kalaallit Nunaannut soqutiginninnera siullermik kinamiut aamma russit Issittumi suliaqarneruleriartornerannut tunngavoq, tamatuma USA sakkutooqarnerulernissaanik pisariaqartitsinermut annertusitippaa. Tamatuma saniatigut aatsitassa Kalaallit Nunaannut soqutiginnilersitsipput.
- USA-p kissaatigisani akilernagit anguniarsarissavai, Jon Rahbek-Clemmensen oqarpoq.
- Taamaattumillu kalaallit tungaannit oqaloqatigiinnerup aallaqqaataaneerneqarnissaa pingaaruteqarpoq, taamaalilluni aalajangersimasunik aamma malugineqarsinnaasunik angusaqarfiusinnaassagami. Aningaasaqarnikkut iluanaarutit aamma kalaallit sunniuteqarneranut tamanna tunngavoq.
- Aalajangersimasut ilaat tassaavoq, Pituffimmi kiffartuussinermut isumaqatigiissutit ajornartorsiutaanerisa iluarsineqarnissaat USA-mut qinnuiginnissutiginissaa.