Pisortanit allagarsiat digitaliusut atuutilersinneqalerput
Namminersorlutik Oqartussat 2019-imi ukiassakkut pisortanit allagarsiarisartakkat qarasaasiakkoortinneri atuutsilissavaat. Siullermik piumasut atorsinnaasaannik, kingornalu 2020-mi apriilip qaammataanit pinngitsoorani atugassatut.
Allagarsiat pisortaneersut qarasaasiakkut digitalinngorlugit nassiunneqartalissapput. Allagarsiat allagarsiivitsinnut pisartut atorunnaarsinneqarnerinik tamanna kinguneqassaaq.
Sumi najugaqarneq apeqqutaatinnagu Kalaallit Nunaanni pisortatut oqartussaasunit qarasaasiaq aqqutigalugu allagarsianik iluarsiissut atorlugu innuttaasut suliffeqarfiillu tigusinnissinnaalissapput. Piffissap ingerlanerani Namminersorlutik Oqartussanit, kommuninit pisortatullu oqartussaanit allanit allakkat tigussaasut atorunnaariartuaarnerinik tamanna nassataqassaaq.
- Nunarsuarmi qeqertat annersaanni najugaqartuusugut immitsinnut ungasippallaarnerput digitalinngorsaanerunitsigut piuneeruttutut issaaq, taamaalillunilu nunamut tamarmut digitaliseeriinermut periusissiami siunertarineqartoq naapertorlugu allakkat digitalikkut nassiussuunneqartalernerisigut immitsinnut suli qaninnerulissaagut, Ilinniartitaanermut, Kultureqarnermut, Ilageeqarnermut, Naalakkersuisoq Ane Lone Bagger, tusagassiuutinut nalunaarummi oqarpoq.
Allagarsianik digitaliusunik iluarsiissummik pisortat atuinialerneranni e-Boks A/S pilersuisartussatut toqqarneqarpoq. Taamaattumillu innuttaasut suliffeqarfiillu e-Boksimik atuisooreersut e-Boksimikkut pioreersukkut allagarsisassapput.
- Pisortat digitalikkut allagaannik pilersuisartutut Namminersorlutik Oqartussat e-Boksimik toqqaasimanerat assut nuannaarutigaarput. e-Boks Danmarkimi pisortanut suleqataasutut ukiuni amerlasuuni misilittagaqarpoq, aammalu pisortat innuttaasullu akornanni attaveqaqatigiinnerup digitalinngorsarnissaanut periarfissat tamaviaarfissallu nalunngilagut. Ilisimasat taakku nunarpassuarnut maannakkut assingusunik suliassaqalersunut atorsinnaapput, e-boksimi pisortaaneq, Ulrik Falkner Thagesen oqarpoq.
2020 pinngitsoorani atorneqalissaaq
Apriili 2020-mit innuttaasut 15-ileereersimasut tamarmik, kiisalu suliffeqarfiit e-Boksikkut pisortanit pinngitsooratik allagarsisalissapput, atortorissaarullu kalaallisut qallunaatullu atorsinnaalissaaq.
Pisortatut oqartussaasoq nalunaarummik innuttaasup e-Boksianut nassiussigaangat nalunaarut tigusisussamut apuussimasutut isigineqartassaaq, taamaattumillu innuttaasut suliffeqarfiillu e-Boksitik alakkartertassagaat pingaaruteqarpoq.
e-Boksi atorniaraanni innuttaasut NemID-mik atuisuusariaqarput. Innuttaasut suliffeqarfiillu NemID-mik peqanngikkunik NemID.nu aqqutigalugu inniminniisoqarsinnaavoq. Innuttaasuttaaq najukkaminni innuttaasunik kiffartuussivinni ikiorneqarsinnaapput imaluunniit kommuunip allaffiani.
Pissutsit immikkut ittuutsillugit e-Boksimik atuisuujunnaarnissamut periarfissaqarpoq. Atuisuujunnaarnissamut malittarisassat 2019-ip naajartornerani uani pissarsiarineqarsinnaalissapput: www.sullissivik.gl.
Paasissutissat annertunerusut atuarniaraanni uani takusinnaavatit: www.sullissivik.gl/, ugguunalu aamma attaveqarlutit pissarsiarisinnaavatit: digitalpost@nanoq.gl.