Nuna ikuallattoq qaminneqangajalersoq
Juulip aallartinneranili nuna ikuallappoq, kisianni danskit qatserisartut sapaatiuppat qamisaanertik naammassissallugu naatsorsuutigaat.
Danskit qatserisartut 38-t marlunngormat Kalaallit Nunaannut aallartinneqarput, nunarujussuaq ikuallattoq qamikkiartorlugu, ullullu 14-it qamisaanissaat naatsorsuutigineqarsimalluni.
Danmarkimi Upalungaarsimanermut Aqutsisoqarfimmi qatserisartut pisortaata Stig Hammerhøjip, arfininngornermi sulinerup naammassinissaa takusinnaalereerpaa.
- Ikuallattup siaruariartornera aamma ikuallattut qaminnissaannut qanittuararsuuvugut, sapaatiuppat naammassinissarput naatsorsuutigaarput, Stig Hammerhøj oqarpoq.
Nunap ikuallannera juulip aallartinneranili ikuallappoq, Sisimiut Kangerlussuullu akornanni nunap iluani aamaartuarluni.
- Tikikkatta pujortorujussuuvoq. Nunarujussuarlu – 10 kvadratkilometerit missaanniittoq – ikuallassimavoq, sumiiffiillu ilaanni suli ikuallattoqarpoq, Stig Hammerhøj oqarpoq.
Kisianni danskit ikiuukkiartortut ikuallattup qaminnissaanut iliuusissaq eqqortoq nassaarisimagunarpaat.
- Najugaqartut sapaatip-akunnerini tallimani qamisaanikuupput, taava aperisoqarsinnaavoq, sooq ulluni arlaqanngitsuni uagut qamissinnaasimaneripput?
- Tassa pumpinik amerlanerusunik nassataqaratta, aamma imermik annerusumik tassungaassisinnaanerput pissutaavoq, Stig Hammerhøj oqarpoq.
Tamatuma saniatigut qatserisartut nunamut kapputtakkanik 80-inik nassataqarput, taakku nunap iluanut imerterisinnaapput, ikuallattullu siaruaannissaa pinngitsoortillugu. Taakku kapputtakkat Sverigimi aasaq kingulleq orpippassuarni ikuallattoqarnerani qamisaanermut atorneqarput.
- Ikuallattoq qamissinnaasimagatsigu iluatsitsillutalu pikkorippugut, Stig Hammerhøj oqarpoq, nangillunilu:
- Kalaallit Nunaanni suliaat nikanarsarneqannginnissaat mianersuutissavarput, sulerulunnikuupput, kisianni uagut atortorpassuaqarnerput iluaqutigaarput.
Qamisaaneq naammassippat, ullut arfinillit qatserisartut unnuiffitsik atortutillu poortornissaat, qatserisartut pisortaata naatsorsuutigaa.
Nunarujussuup ikuallannera Sisimiut eqqaani juulip 8-ni aallartippoq. Politiit naapertorlugit pujoorivik ikuallannermut pissutaavoq.
Danmarkimi Upalungaarsimanermut Aqutsisoqarfik suliamut 3 millionit koruunit tikillugit immikkoortitsivoq.
/ritzau/