Kujataani anorersuarnera innarluutillit illersuisuannut akornusersuivoq
Tiliup Kujataani tikeraarnerminut pilersaarutini allanngortittariaqarpai, anorersuarnerani Narsami sapernutinneqaramik.
Inuit innarluutillit illersuisuat Christina Johnsen Tiliumilu sulisut ullumi Narsamit Aalluitsup Paanut aallarsinnaanngillat.
Tassani pilersaaruteqaraluarput inuit innarluutillit pisinnaatitaaffii pillugit sammisaqartitsissallutik inunnillu ataasiakkaaralutik oqaloqatiginnissallutik.
- Narsarmiit Alluitsup Paanut ajoraluaqisumik ullumi angalasinnaanngikkallarpugut. Alluitsup Paarmiunut ullumi pilersaaruteqaraluarpugut. Angalanitsinni pilersaarutinut tunngatillugu suut piviusunngortinneqarsinnaanersut paasilluariarutsigut nalunaaruteqarumaarpugut, Inuit innarluutillit illersuisuat Christina Johnsen, tusagassiuutinut nalunaarummi oqarpoq.
Inuit innarluutillit illersuisuat Kommune Kujallermut angalaarpoq inunnut innarluutilinnut atugassarititaasut paasisassarfigalugit, inuit innarluutillit pisinnaatitaaffii pillugit sammisaqartitsissalluni, Tiliup suliniutai pilersaarutaalu saqqummiutissallugit inunnullu innarluutilinnut tunngasunik aallaaveqarluni inunnik ataasiakkaaraluni oqaloqateqartassalluni.
Pilersaarutit naapertorlugit Tilioq Alluitsup Paanut ullumi 11.30 tikittussaangaluarpoq, nunaqarfimmilu sammisaqartitsissalluni.
Narsarmijinut aqagu 14. august tikeraarluni, Nanortalimmiisalluni 15.-16.august. Qaqortoq 17.-21. august savaatilinnullu 22. august tikeraassalluni.
- Massakkuungallartoq ullut ataasiakkaartariaqarpagut takullugulu suut piviusunngortissinnaanerlutigit, inuit innarluutillit illersuisuat Christina Johnsen oqarpoq.