Aataap assinga toqqarneqarnerpaatut ajugaasoq
Frederiksborg Slotimi Det Nationalhistoriske Museumimi saqqummersitsineq PORTRÆT NU! ammarneqarmalli takuniaasut inuup assinga nuannarinerpaasartik toqqarsinnaasimavaat. Dida Geisler Heilmann Nuumminngaanneersoq ajugaasuuvoq
Aasap ingerlanerani Frederiksborgimi avannaamioqatigiinnit saqqummersitsinermi immikkut ittumi inuup assinga sorleq, Carlsbergsfondets Portrætprisimik, takuniaasut toqqarneqarnerpaattut ajugaassanersoq takuniaasut toqqarsinnaasimavaat. Toqqarneqarsimasut kisinneqareermata paasinarsivoq Dida Geisler Heilmannip inuup assinganik assilisaa “The Modern Greenlandic Aataa” ajugaasoq.
Dida Geisler Heilmann ulluinnarni Nuummi Perorsaanermik Ilinniarfimmi sulisuuvoq. Sunngiffimmini nipilersortarpoq namminerlu erinniorluni taalliorlunilu erinarsuusiortarluni. Sunngiffimminili aamma assiliisarpoq. Assilissallugit nuannarinerpaasai tassaapput pinngortitaq unnukkullu assilisassat aammattaaq timersornerup iluani assiliineq. Ingammik pinngortitami assilisai alutornarluinnartut illoqarfigisaminillu Nuummik assilisai amerlasuut internetikkut attaveqartarfitsigut nalussanngilaat, tassani assilisani saqqummiuttarpai.
Inuup assinginik unammisitsinermi aataap assinga atorlugu peqataavoq - takuniaasunillu tiguartitsisimavoq.
Inuup assingata inuttaa meeqqanik inuusuttunillu inuttut sanngiitsumik inissisimasunik suliamik ingerlatsisutut saniatigut nipilersornermik soqutigisaqartoq oqaluttuaraa. Assut inuunermik nuannarisalittut, nuannarilluinnagaalu tassaasut tuluit heavy metalimik nipilersortartui Deep Purple-jusut oqaluttuaraa. Allamik asseqanngilaq kiffaanngissuseqarninilu pingaartittuulluniuk.
- Assut nuannaarutissinneqarpunga nersorneqarlungalu. Taama amerlatigisut assi toqqarsimammassuk nuanneqaaq attortinnaqalunilu, Dida Geisler Heilmann akissarsitinneqarnini tigugamiuk oqarpoq. Akissarsitinneqarneq aningaasanngorlugu 10.000 koruuninik ilaqarpoq.
2019-imi Frederiksborg Slotimi PORTRÆT NU! Carlsbergfondets Portrætpris arfineq aappassaarluni ingerlanneqarpoq. Ukioq manna nunat avannarlerneersut Europallu kangisissuameersut peqataapput. Inuit assingi assigiinngitsutigut saqqummersinneqarput, qalipakkatigut, qiperukkat, titartakkat assillu, videoliat ikkussuussallu saqqummersinneqarput.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...