Isiginnaartitsisartunngorniarfik ilungersorpoq. Isiginnaartitsisartunngorniartoq maanna ataasiinnaavoq, ilinniartunimi tallimaasuni sisamat ilinniakkaminnik unitsitsisimapput. Aviisi AG sapaatip akunnerani uani taama allappoq.

Inatsisartuni ilaasortap, Peter Olsenip isiginnaartitsisartunngorniaqp ataasiinnanngorsimanera uggoraa.

- Isumaginninnikkut unammilligassarpassuaqaleruttorfitta nalaani, namminiilivikkiartuaarnittalu aqqutaani, aatsaat taama timikkut tarnikkullu nukittorsarneqarnissarput pingaaruteqartigilerpoq. Inuiattut anersaatsigut nukittorsarumalluta suliniarnitsinni, siunertap anguniakkallu angunissaanut sakkussatta pingaarnersaasa ilagaat Nunatta Isiginnaartitsisarfia taassumalu ataani Isiginnaartitsinermik ilinniarfiup piorsartuarnissaa​​​​​, tusagassiutinut nalunaaruteqarluni allappoq.

Akuerineqarsinnaanngitsoq

Inuit Ataqatigiit pisut paasisinnaanngilaat akueriinnarsinnaanagillu.

Peter Olsen taamaammat isumaqarpoq Nunatta Isiginnaartitsisarfia Naalakkersuisunit, taakkulu tapersersortaannit, nukittorsarneqartariaqartoq, ukiuni siuliinitut nukillaarsaannarnagu, allassimavoq.

- Naluneqanngitsutut Siumup siuttuuneratigut tamatigut isiginnaartitsisarfik sipaarniarfigineqartuartarsimavoq. Illuatungiliuttuugaluarluta ukioq manna Inuit Ataqatigiinnit aningaasanut inatsisissami peqataanitsigut aamma isiginnaartitsinermiit anersaakkut immersortuarneqartarnissarput qulakkeerusullugu allaat 3 mio. koruunit tikillugit aningaasaliinerunissamut qulakkeerinnippugut, Peter Olsen allappoq.

Taassuma apeqquserpaa pitsaanerussannginnersoq isiginnaartitsisartunngorniarfiup ilinniarfimmut pioreersumut allamut, soorlu Ilisimatusarfimmut, nuutinneqarnissaa, taamaasilluni isiginnaartitsisartunngorniarfik nukittunerulerniassammat. Ilanngullugu kissaatigaa Nunatta Isiginnaartitsisarfia isiginnaartitsisartunngorniarfillu amerlanerusunik aningaasaliiffigineqartalissasoq, ilinniartut ilinniartitsisullu atugassatigut pitsaanerusumik inissisimalernissaat anguniarlugu.