Ernera bøjletaassaaq: 40.000 koruuninik akiligassaqassaaq

Tina Abildgaard 35-inik ukioqarpoq, ilinniartuulluni Nuummilu inissiani akisunerit ilaanni najugaqarluni. Pingasunik meeraqaraluarluni qaammammullu aalajangersimasunik akiligassaqartaraluarluni, isumaginninnermi siunnersortitut ilinnialissalluni aalajangersimavoq, nalunagu taama aalajangerneq aningaasaqarnikkut allannguingaatsiartussaasoq.

Maannali nammineerluni aappanilu ikinnerpaamik 40.000 koruuninik akiligassaqaleriasaarput, ernerammi bøjletaartariaqavippoq. Akilersugassaq taanna namminneq akilersussallugu naatsorsuutigisimanngikkaluarpaat.

- Bøjleqartinneqarluni suliarineqarnissaa nammineerluta akilertussaallugu paasigatsigu, tassa soorlu naakkut tillutsiinnarluni. Pisortani ikiorneqarnissaa naatsorsuutigisimagaluarparput, Nunatsinnimi meeqqat kigutileritittarnerat akeqanngimmat. Taamaattussaasimanngilarli, anaanaq Sermitsiaq.AG-mut oqarpoq.

Kigutit inissisimanerat aarlerinartoq

Ernera qulingiluanik ukioqarluni pisortat kigutileriviani 2016-imi pisarnertut misissorneqarpoq. Kigutigissaasup kigutilerisumut bøjlelerisartumut piaartumik innersuuppaa, kigutilerisup nalilissammagu bøjletaassanersoq. Ernerata kigutai kiisiniarnermi equgapput, alliit ilummoornerullutik, tamuaneranullu tamanna sunniisarpoq.

- Susoqanngilaq. Kigutileriffimmi kigutigissaasumut ukioq manna aallartissimalersoq misissorneqaqqippoq, tassanilu nalilerneqarpoq piaartumik bøjlelerisumit misissorneqartariaqartoq. Kigutaasa equnganeri aarlerinartoqarput, Tina Abildgaard oqaluttuarpoq.

Pisortat kigutileriffiini bøjlelersuiunnaarput

Qaammatini marlunni utaqqigaluariarluni, Tina Abildgaard nammineerluni kigutilerivimmut apriilimi maajimiluunniit saaffiginneqqippoq, paasiumallugu ernini qaqugu kigutilerisumit bøjlelerisumit misissorneqassanersoq. Kingusinaareersimavorli.

- Paasitinneqarpugut pisortat kigutileriffiini bøjlet atorlugit kigutit narlorsarneqartarnerat neqeroorutaajunnaarsimasoq. Taama aalajangernermut tunngavilersuutigineqarpoq peqqinnissaqarfiup iluani aaqqissuusseqqittoqassasoq, taamaammallu ilisimaneqanngitsoq bøjlet atorlugit kigutinik narlorsaasarneq pisortani neqeroorutaaginnassanersoq, Tina Abildgaard oqarpoq.

Sermitsiaq.AG-p Peqqissutsimut Naalakkersuisoqarfik saaffigaa pisortani bøjlet atorlugit kigutit narlorsarneqartarnerat peqqinnissaqarfimmi aaqqissuusseqqinnermi allanngortinneqassanersoq uppernarsaqqullugu. Naalakkersuisoqarfimmi immikkoortortami pisortap Michael Würtzip, kigutit inissisimanerisa aaqqissuunnissaannut neqeroorut peqqinnissaqarfimmi aaqqissuusseqqinnermi allanngortinneqassanersoq pillugu itinerusumik oqaaseqarsinnaanngilaq.

- Kigutit narlorsarneqartarnerannut tunngatillugu aggustip naalernerani politikkikkut aalajangiisoqassaaq, taassuma tungaanut naalakkersuisoqarfiup oqaatigisinnaanngilaa kikkut bøjletaarnissaannut misissuisarneq sukkut qanorlu allanngortinneqarsimanersoq, peqqissutsimut naalakkersuisoqarfimmi immikkoortortaqarfimmi pisortaq, Michael Würtz nassuiaavoq.

Bøjlet pillugit suliaq

Sermitsiaq.AG-p sapaatip akunnerata siuliani oqaluttuarisinnaavaa pisortat kigutileriviini kigutit narlorsarniarlugit bøjlelersuisarnerit unitsinneqarsimasut. Allannguineq utaqqiisaasumik atuunnersoq unitsivinneqarnersorluunniit peqqinnissaqarfimmi qullersanit imaluunniit Peqqissutsimut Naalakkersuisoqarfimmit oqaatigineqanngilaq.

Martha: Nedskæringer er ikke godkendt

Taamaattoq Peqqissutsimut Naalakkersuisoq, Martha Abelsen (S) tusagassiutinut nalunaaruteqarpoq bøjlelersuisarnermut misissuisarnerit maleruagassaat nutaanngorsimasut, bøjlelersuisarnerilli unitsinneqarsimanatik.

- Tamanna mamianarpoq, ilami Kalaallit Nunaanni peqqinnissaqarfimmi meeqqat sullinneqarnerat akeqanngikkaluarpoq, Tina Abildgaard oqarpoq.

Qanoq pisoqassagaluarpalluunniit ernertik bøjleqalissasoq, aappanilu aalajangiusimapput. Qanorluunniit akeqaraluarpat.

- Bøjlet akilersulerutsigit inuunerput qanoq ikkumaarnersoq takorlooruminaatseqaara. Ullumikkut akiligassatsinnut inissaqartitseqqinnaarpugut, Tina Abildgaard oqarpoq, taassuma nassuerutigaa pisumi qanoq ilioriusissaarunneq misiginartoq.