Tele-Post anorisaatinik misileraavoq

Tele-Postip aningaasartuutit annikillisinniarlugit anorisaatinik misileraanermik aallartitsivoq, taakku sakkortusaaviit nukissamik pilersussavai.

Kalaallit Nunaanni sakkortusaaveqarfiit 50-t ingerlanneqarnerat aningaasarpassuarnik akeqarput, qulimiguullit ikummatissanik aggiussisarmata.

Suliffeqarfik ataavarnerulerniarluni aamma aningaasanik sipaarniarluni Tele-Post maanna Nuuk kujataani, Meqquitsumi anorisaammik misileraalerpoq.

- Anguniarneqarpoq anorisaatip nukissiamik naammattumik pilersuisinnaanissaa, taamaalilluni sakkortusaavik atuinermi pingajorarterutaata aappaanik atuinikinnerulersinnaalluni aamma tamatumunnga ilutigitillugu silaannarmik mingutitsinnginnerusumik atuinissaq qulakkeerneqarluni, ingerlatseqatigiiffik tusagassiuutinut nalunaarummi taama ilisimatitsivoq.

- Anorisaammik misilittaaneq ajunngitsumik ingerlappat uagut anguniarparput Kalaallit Nunaani sumiiffinni arlalinni anorisaatinik peqalernissaa. Taamaaliornitsigut pinngortitarput pinnersorsuaq pitsaanerusumik paarissavarput aamma suliffeqarfimmut silaannaap pissusianut tunngatillugu aningaasanik sipaarluta. Taamaattumik misilittaanerup taassuma malinnaaffiginissaa pissangassutigaarput, teknikimut IT-mullu pisortaq Jonas Hasselriis oqarpoq.

Svalbardimi misilittarneqarsimasoq

Anorisaat Nuup kujataani napparneqartoq, Svalbardimi misilittarneqarnikuuvoq, anorilu 70 m/s-inik sukkassusilik akiorsinnaavaa. Anorisaat agguaqatigiissitsilluni ukiumut 7000 kWh-mit 6 m/s-mik anoreqarnerani pilersuisinnaavoq.

Tele-Post ullumikkut sakkortusaaviisa 96 procentii seqerngup qinngornerinik tigooraatinik peqarpoq. Seqerngup qinngornerinik tigooraatit aasaanerani nukissiamik annertujaartumik pilersitsisarput, aammali ukiuunerani nukissiaq minguitsoq annikinnerulersarluni. Taamaattumik Tele-Postimit neriuutigineqarpoq nukissiamik minguitsumik nioqqutissiornerup ukiuunerani atatiinnarneqarnissaa anorisaatit iluaqutigalugit.

- Anorisaatit misilittarnerisigut qulakkeerparput anorip sakkortuup aamma silap pissusiata peqqarniitsup akiorneqarsinnaanera, annertunerusumik aningaasaliissuteqartinnata aamma sakkortusaaveqarfinnut ingerlatsinermut aamma nukissiamik pilersuinermut sunniuteqanngitsumik, suliamut aqutsisoq John Pedersen oqarpoq.

Powered by Labrador CMS