Ilisimatuut misissuinerup ilaqutariit inissisimanerat pillugu paasinninnerulernissamut atorneqarsinnaanera neriuutigaat.

Meeqqat siullukkaangata ilaqutaasut tamarmik eqqorneqartarput, meeqqallu siullunnerannut angajoqqaat imminnut pisuutittarlutik. Kalaallit Nunaanni Pinngortitaleriffiup aningaasalersimasaani, misissuinermi saqqummersinneqaqqammersumi tamanna atuarneqarsinnaavoq. Nakorsaq Kalaallit Nunaanni Ilisimatusarfimmi Københavns Universitetimilu ph.d.-nngorniaq Malene Nøhr Demant misissuisimavoq, misissorsimallugu meeraq siullukulaarpat tamanna ilaqutariit inuunerannut qanoq kinguneqartarnersoq. Ilaqutariit inissisimanerat paasisaqarfigineruniarlugu Kalaallit Nunaanni illoqarfinni assigiinngitsuni pingasuni najugaqartut apersorsimagai, tusagassiutinut nalunaarummi ilisimatitsissutigineqarpoq.

Kinguneri assigiinngitsut

- Misissuinermi takutipparput Kalaallit Nunaanni siulluttuuneq ilaqutariinnut assigiinngitsunik kinguneqartartoq, ilaatigut sinissaarunneq, kiaqarneq siuserinerlu aqqusaarneqartarlutik. Kingunerluutit ataqatigiiaat assigiinngitsuupput, imminut pisuutinneq, kanngusunneq inuiaqatigiinnilu immikkoornerulerneq aamma initungaatsiartarlutik. Meerarlu siulluppat angajoqqaajusut ernumasarput, ernumagalugu meeqqat siunissaa ineriartornissaalu qanoq sunnerneqassanersut, Malene Nøhr Demant oqaluttuarpoq. 

Kalaallit Nunaat nunarsuarmi tamarmi siullunnermik napparsimasoqarnerpaat ilagaat, kalaallit meeqqat inuusuttullu 14 procentii siulluttarlutik. Malene Nøhr Demant ph.d.-nngorniarnermini suliaminut atatillugu misissuivoq, siunertaralugu meeqqat siulluttut pitsaanerusumik nakorsarneqartalernissaat.

Misissuineq

Misissuinermi Statens Institut for Sundhedimi siunnersorti Christina Viskum Lytken Larsen aamma Sjællands Universitetshospitalimi Siutit, qingap, qungatsip aamma alleqqullu nakorsaat, Ilisimatusarfimmilu professori Preben Homøe suleqatigineqarput.

- Neriuppugut suliniutip oqinnerulersissagaa paasissallugu meeqqat siullukkaangata angajoqqaat qanoq eqqarsaateqaqqajaasarnersut sunillu ernummateqartarnersut, kiisalu peqqinnissaqarfimmi sulisut ilaqutaasunut paasinninniarnerat oqinnerulersissagaa, Malene Nøhr Demant oqarpoq nangillunilu:

- Taamaasilluta peqqinnissaqarfimmi sulisutut meeqqap nakorsarneqarnerannut angajoqqaallu ernumanerannut ikiorsiinissamut iliuuseqarnerusinnaalerpugut.

Atuagassiaq

Misissuinermi inerniliussat nunat tamalaat akornanni atuagassiami ”International Journal of Pediatric Otorhinolaryngology”-mi saqqummersinneqaqqammerput. Malene Nøhr Demantillu misissuinermi paasisani ataatsimeersuarnermi ”International symposium on recent advances in otitis media 2019”-imi, Californiami 9.-13. junimi ingerlanneqartumi saqqummiuteqqammerpai.