Danmarkimit avissaarneq akeqarpoq

Namminiilivinnerup aningaasatigut kingunerisassai pillugit ilisimasaqaraanni Kalaallit Nunaata namminiilivinnissaanut akerliusumik taasisoqarnerusarpoq. Tamanna misissuinerup nutaap takutippaa.

Namminiilivinnissamut inuit qanoq isummernersut Danmarkip aningaasaqarnikkut isumalluutaanera pillugu ilisimasaqarneq sunniuteqartarpoq. Tamanna illoqarfinni nunaqarfinnilu assigiinngitsuni 13-ini innuttaasunik 600-nit amerlanerusunik oqaloqateqarnermik tunngaveqarluni misissuinerup nutaap takutippaa.

Aviisi Sermitsiaq taama allaaserisaqarpoq.

- Namminiilivinnissaq pillugu innuttaasunik taasisitsinermi qanoq taasissanerluni akinnginnermi paasissutissinneqarsimanngikkaanni taava amerlanerussuteqartut namminiilivinnissaq toqqartarpaat. Danmarkimilli aningaasatigut isumalluuteqarneq pillugu paasitinneqarsimagaanni amerlanerit namminiilivinnissamut akerliusarput. Allatut oqaatigalugu, aningaasaqarneq pillugu paasitinneqarnikkut amerlanerit namminiilivinnissamut akerliusarput, Københavnip ilisimatusarfiani Aningaasaqarnermut immikkoortortami ph.d.-nngorniartoq Gustav Agnemann oqaluttuarpoq.

Namminiilivinnermut naaggaartut

Misissuinermit atuarneqarsinnaavoq ullumikkut innuttaasunik taasititsisoqartuuppat Kalaallit Nunaat naalagaaffeqatigiinnit anissanersoq 40 procentit akuersipput. 30 procentit akuersaanngillat, 20 procentit qanoq taasissanerlutik nalornillugu 10 procentillu taasiniaratik. Procentilersuinerilli annertuumik allanngortarput apeqquteqarneq sioqqullugu aningaasatigut isumalluuteeqarneq paasissutissiissutigineqaraangat. Taava amerlanerit taasisarput; tassalu 43 procentit namminiilivinnissamut naaggaarlutik, 36 procentit angertut. 15 procentit nalornillutik, 6 procentillu taasiniaratik.

Paasissutissanik katersineq ilisimatuut Minik Rosing David Dreyer Lassenilu ilitsersuisoralugit Københavnip ilisimatusarfiata Ilisimatusarfiullu akornanni suleqatigiinnikkut ingerlanneqarpoq. Ilisimatusarfimmit ilisimatuunut ikiortit sisamat peqatigalugit Gustav Agnemannip Social Data Sciencemiillu Kelton Ray Minorip Kalaallit Nunaata avannaanniit kujataanut illoqarfinni nunaqarfinnilu assigiinngitsuni 13-ini inersimasut 648-it ornillugit apersorpaat.

Allaaserisaq tamaat Sermitsiami atuaruk – uani ataani aviisimut isissutissarsigit:

Powered by Labrador CMS