Sakkutooqarfiusimasunik saliinissaq kiisami aallartinneqalerpoq

Maanna Amerikarmiut qimaannangaannik saliineq aallartippoq, Tasiilap eqqaani Ikkattimi aamma Nuup kujataani Marrarmi.

Amerikarmiut sakkutooqarfigisimasaannik saliisoqalerpoq, immikkoortortaqarfinni marlunni, tassa Ikkattimi aamma Marrarmi saliisoqassalluni.

- Sumiiffinni marlunni suliaqartoqarnerani aamma avatangiisinik misissuisoqassaaq, sumi sukumiisumik avatangiisinik misissuisoqassanersoq aqutsisoqatigiit isummerfiginiassammassuk. Sakkutooqarfikuni qanoq mingutsitsisoqarsimatiginersoq paasisariaqarparput. Paasissutissat taakku pingaaruteqarput, saliilluartoqarnissaa anguniarlugu, Naalakkersuisunut siulittaasoq Kim Kielsen tusagassiutinut nalunaarummi allappoq.

Sapaatit akunnerini pingasuni siullermik
Kommuneqarfik Sermersooq saliinissani siullerni marluusuni tamanut suliariumannittussarsioqqammerpoq. Aallaqqaammut sapaatit akunnerini pingasuni sumiiffinni taakkunani saliisoqassaaq. Taamatut saliinerup siunertaraa eqqakkanik saliinissaq iluatsillugulu qanoq mingutsitsisoqartigisimanersoq misissussallugu, mittarfeqarsiusimasut salillugit aallartivinneqannginnerini, tusagassiutinut nalunaarummi ilisimatitsissutigineqarpoq.

Saliinissap piviusunngornissaanut danskit aamma kalaallit oqartussaasuisa akornanni pitsaasumik siunnerfeqartumillu suleqatigiittoqanera nuannaarutigaara. Kommuneqarfik Sermersooq suliassanut toqqaannartorujussuarmik tunniusimallunilu akuunera suliamut annertuumik nukittorsaataavoq, Naalakkersuisut siulittaasuat Kim Kielsen oqarpoq.

Ukiuni arfinilinni atuuttussaq
Suli iluamik aalajangiunneqanngilaq Ikkattip ilaa kulturikkut oqaluttuarisaanermut pingaaruteqarnera pissutigalugu allanngutsaaliorneqassanersoq.

Januarimi 2018-imi Naalakkersuisut Siulittaasuat Kim Kielsen aamma Danmarkimi Avatangiisinut Inuussutissanullu Ministeriusimasoq Esben Lunde Larsen politikkikkut isumaqatigiissuteqarput Kalaallit Nunaanni Amerikarmiut qimaannagaannik saliinissamut tunngasumik. Isumaqatigiissummut atatillugu Danmarkip 180 millioner koruunit immikkoortippai ukiut arfinillit ingerlaneranni amerikamiut sakkutooqarfikuinik salinneqarnissaannut atugassanik.

Powered by Labrador CMS