Tasikuluullip qeqertaasaani Adventure Racerneq
Peqatigiiffik nutaaq Kujataani Tasikuluullip qeqertaasaani nunami kusanartumi aallaaveqartoq kilometererpassuarnut arpannermut, sikkilernermut qajartornermullu qaaqqusiniarpoq.
Qaqortumi pilersitsilluni maajip aallaqqaataani 2019-imi ataatsimiittoqarnerani peqatigiiffik Tasikuluulik Race pilersinneqarpoq.
Inunnut timersortartunut ataatsimoorfimmik pilersitsinissaq aamma Tasikuluullip qeqertaasaani Kujataata nunataani asseqanngitsumi savaateqarfiusuni qallunaatsiaat illorsuakuisa eqqaanni ukiumoortumik pisartumik neqerooruteqarnissaq siunertaavoq, Kujataa nunarsuarmioqatigiit kingornussaat oqaatigalugu aamma minnerunngitsumik najukkami takornariaqarnermut tapertaaqataalluta, peqatigiiffik tusagassiuutinut nalunaarummi allappoq.
Pisoq
Peqatigiiffiup aaqqiissuussassani siulleq – Tasikuluulik Adventure Race – 13-14. juli 2019 pisussaq pilersaarusiorlugu aallarteruttorpoq. Ullut marluk ingerlanerini peqataasut 36 km arpassapput, 12 km tasikkut qajartussapput, 42 km sikkilissapput aamma rapelerlutik sermersuup ungasinngisaani tupermi unnuissapput.
Ingiaqateqarluni tamanna pissaaq.
Paasissutissat amerlanerusut “Tasikuluulik Adventure Race 2019”-imi nassaarineqarsinnaapput, gruppi Facebookimiippoq.
Gunnar Frederiksen siulersuisuni siulittaasutut toqqarneqarpoq, Elvis Høegh-Olsen siulittaasup tulliatut aamma Nikolaj Krabbe Jepsen siulersuisunut ilaasortanngorpoq. Ilaasortaanermut akiliut ukiumut 100 koruuniuvoq, kikkullu tamarmik aalarusuttut allanillu timip aalatinneranik misigisassarsiornermillu naapitserusuttut tikilluaqqusaapput, peqatigiiffik taama ilisimatitsivoq.