Inatsisitigut ataataqanngitsut pillugit piviusulersaarusiortoqalersoq

Aka Hansenip angani inatsisitigut ataataqanngitsoq Konrad Brummerstedt pillugu piviusulersaarusiamik pilersitsinissaminik ukiuni marlunni ineriartortippaa. Namminersorlutik Oqartussat Filmiliornermik ingerlataqartunut aningaasaliissutaanit 200.000 koruuninik taperneqarpoq.

- Piviusulersaarusiap ineriartorteqqinneqarnissaanut qilanaarpunga. Inatsisitigut ataataqanngitsut oqaluttuarisaanitsinni ilaavoq, taamaammat suliassaq pimoorutissavara, suliap aallartinnissaanut qilanaarpunga, tusagassiutinut nalunaarummi Aka Hansen oqarpoq.

Konradip oqaluttuassartaa misissuiffiginikooqaa. Sisimiuni inunngorpoq, Maniitsumi meeqqat angerlarsimaffiannut meeraalluni nuutsitaalluni. Qulingiluanik ukioqalernissami tungaanut tassani najugaqarpoq, tassanngaannit Paamiuni ilaqutartaarluni.

- Maannakkut manuskriftitaa ingerlatileruttorakku oqaluttuassartaa suli paasitikkusuppallaanngilara. Kisianni inuttut qanoq attuitigisarnersoq ersersikkusuppara. Inatsisitigut ataataqanngitsut pillugit inatsit 1972-ip tungaanut inuppassuarnut sunniuteqarnikuuvoq, Aka Hansen oqarpoq.

Kikkut tamarmik ataatartik kinaanersoq ilisimassallugu pisinnaatitaaffigaat. 2014-imili inatsit nutaaq 1. juni 2014-imi atuutilermat inatsisitigut ataataqanngitsut nutaanik pisinnaatitaaffeqalerput. Kalaallit Nunaata Kangiani Avannaanilu 1963-imit 1973-ip tungaanut katissimanngitsunut meeraasimasut kina ataatarinerlugu paasinissaanut pisinnaatitaaffeqanngillat. Tassani piffissami inuusut 2014-mi aatsaat pisinnaatitaaffeqalerput paasiniassallugu kina ataatarinerlugu.