Lagtingimi siulittaasup savalimmiormiut folketingimi ilaasortaatitaqartarnerat atorunnaarsinniarpaa

Savalimmiut Folketingimi sinniisoqartarunnaartariaqarluarpoq. Páll á Reynatúgvu (Tjóðveldi/Republikanerne), taama isumaqarpoq, danskillu inatsisartuini siunissami sinniiseqartarneq

Savalimmiut Folketingimi sinniisoqarnissaat naleqqukkunnaarpoq. Lagtingimi siulittaasoq, Páll á Reynatúgvu (Tjóðveldi/Republikanerne), taama oqarpoq, Savalimmiut Folketingimut ilaasortaatitaqartarnerat atorunnaarsinneqarnissaanut taanna aalajangiiffissatut siunnersuummik saqqummiussivoq.

Folketingimi savalimmiormiut inaat atorunnaarsinneqartariaqartut, siunnersuummut oqaaseqaatini Páll á Reynatúgvu taama oqarpoq.

Taanna tunngaviusumik inatsimmut innersuussivoq, ima allaqqavoq:

”§ 28, Folketingi ilaasortanut amerlanerpaamik 179-isunut atatsimoorfiuvoq, taakkunannga marluk Savalimmiunit toqqarneqartarput aamma marluk kalaallit Nunaannit.”, aamma, ”§ 32, stk. 5. Inatsisitigut immikkut ittumik savalimmiormiut aamma kalaallit folketingimut qinigaatitaasa atuutilernerat aamma atorunnaarsinneqarnerat malittarisassiorneqarsinnaapput”.

Oqaaseqaatini Savalimmiut taaneqarnera peerneqartariaqartoq, taanna oqaaseqaatini allappoq. Savalimmiormiut Folketingimi qinigaaffii siornatigutut tulluarunnaarsimasut, Páll á Reynatúgvu isumaqarpoq.

- Ataatsimut suliassaqarfiit amerlanerpaat Savalimmiunit angerlaassorneqareerput, suliassaqarfiillu Savalimmiut kunngiitsunngornissaannut toqqaannartumik tunngassutillit kiserngorunnikuupput, Páll á Reynatúgvu allappoq.

Savalimmiuni kisimi inatsisiliorneq

Savalimmiunit folketingimut ilaasortat danskit politikkianni eqqumiitsumik atuuffeqalersimasut, Páll á Reynatúgvu isumaqarpoq.

Danmarkimi kina ministeriuninngussanersoq aalajangiisuusinnaapput, aamma nunami allami innuttaasunut atukkanik inatsisiliorlutik.

- Tamanna uniuulluinnarpoq, rigsombudsmandip kina Savalimmiuni naalakkersuisuni kina ilaasortaassanersoq imaluunniit inatsiseqarneq qanoq innersoq aalajangernissaannut periarfissaqarsimasuuppata akuerisimanavianngikkaluarparput, Páll á Reynatúgvu oqaaseqaatini allappoq.

Savalimmiut aamma Danmarkimi sinniisoqarnissamik pisariaqartitsissagaluarpat, taama Savalimmiut Københavnimi aallartitaqarfianut tamanna suliassaasoq, Savalimmiuneersunit folketingimut ilaasortanit toqqakkanit suliassaanngitsoq, taanna aamma oqarpoq.

Akuerineqarnavianngitsoq

Siunnersuut lagtingimi qaqugut suliarineqassanersoq, lagtingip nittartagaani atuarneqarsinnaanngilaq.

Lagtingimi amerlanerussuteqartut siunnersuummik tapersersuinissaat qularnarpoq. Naalakkersuisoqatigiit ataatsimoortut siunnersuummik saqqummiussisuunngillat.

Powered by Labrador CMS