Bay: Kinguaassiutitigut atornerluisarneq pillugu suli paqumiginnittoqarpoq

Illoqarfiit arlallit kinguaassiutitigut atornerluisoqarsimaneranik nalunaarutiginniffiusimanngitsut, politimesterip ernumanartoqartippai.

Seksuelle overgreb, demonstration, optog, Nuuk

Politiit ukiumut kisitsisaataat atuaqqissaaraanni, illoqarfinni arlalnni meeqqamut 15-it ataallugit ukiulimmik atoqateqartoqarsimaneranik sulianik nalunaarsuisoqarsimanngilaq.

Tamanna politiip nuannaarutigissagaluaraa isumaqartoqarsinnaavoq; kisianni akerlianik taanna isumaqarpoq.

- Aasianni suliat qulingiluaanerannit aamma Nanortalimmi suliaq aqqaniliunerannit, assersuutigalugu Maniitsumi imaluunniit Narsami suliaqannginnerput ernumassutigineruara, politimesteri Bjørn Tegner Bay, Sermitsiaq.AG-mut taama oqarpoq.

Kinguaassiutitigut atornerluinerit pillugit suliat amerlassusaat

Narsaq – 0

Ittoqqortoormiit – 0

Maniitsoq – 0

Qasigiannguit – 0

Paamiut – 1

Kangerlussuaq – 1

Qeqertarsuaq – 1

Qaqortoq – 2

Qaanaaq – 2

Simiut – 3

Ilulissat – 3

Uummannaq – 4

Upernavik – 5

Aasiaat – 9

Nanortalik – 10

Nuuk – 14

Tasiilaq – 20

Tigulaarinniffik: Politiit ukiumut 2018-imut nalunaarutaat

Tassami illoqarfinni aamma taakkunani sulianik peqartussaagaluartoq suna tamarmi tikkuussivoq; kisianni nalunaarutigineqarsimanngillat.

- Innuttaasut misissuiffigineqarnerannit aamma MIO-p angalanerminit nalunaarusiaanit nalunngilarput, nuna tamakkerlugu meerarpassuit kinguaassiutitigut kannguttaatsuliorfigineqarsimasut. Taava apererusuppunga, illoqarfinni arlalinni suliaqannginnitsinnut imaluunniit ataasiinnarmik suliaqarnitsinnut suna pissutaava?

- Kinguaassiutitigut kannguttaatsuliortarneq pillugu nalunaarutiginninnissamut nuna tamakkerlugu paqumiginnikkunnaartoqarsimannginnera ernumassutigaara. Oqartaraluarpugut paqumiginnittoqarunnaartoq; kisianni suli atuuttoq kisitsisaatittaa takutippaat.

- Pitsaaliuinermi sulinermi tamanna eqqumaffigineqarnerusariaqartoq isumaqarpunga.

Tasiilaq sulianik 20-nik ingerlatsiffiusoq 2018-imi illoqarfinni suliaqarfiunerpaavoq. Tamanna soorunami ajornartorsiutip annertuneranut takussutissaasoq, Bjørn Tagner Bayip oqaatigaa. Kisianni tamatuma saniatigut ajornartorsiut Tasiilami ukkatarineqartorujussuunikuuvoq, suliallu politiinut nalunaarutigineqartarnerinik tamanna kinguneqarpoq.

Powered by Labrador CMS