KNI pillugu pilersaarut Demokraatit itigartitsissutigigaat
KNI Kalaallit Nunaanni illoqarfinni annerusuni pisiniarfinnik ammaanissaanut pilersaarut, maanna inuussutissarsiornermut naalakkersuisoqarfimmi suleqatigiissitamit misissuiffigineqartussaq, Demokraatit akueriumanngilaat.
Demokraatit inuussutissarsiorneq pillugu oqaaseqartartuat, Namminersorlutik Oqartussanit pigineqartoq KNI, Kalaallit Nunaanni illoqarfinni annerni pisiniarfinnik ammaanissaanut isumassarsiaq pillugu ersarilluinnartumik akerliliivoq.
- Namminersortut ingerlalluarlutik niuerfigisaanni pisortat ingerlatsilernissaminnut tunuarsimaassapput, Randi Vestergaard Evaldsen erseqqissaavoq.
Nunamut ajoqutaasinnaasoq
Taamaasiortoqassappat nunat tamalaat Kalaallit Nunaannut aningaasaleerusussinnaanerat annikinnerulersinnaasoq, tamannalu nunamut ajoqutaassasoq, taanna isumaqarpoq.
- Pisortat namminersortullu niuernermi akulerutissagutsigit aningaasaleerusussusermut innarliisinnaavoq. Assigiinngitsunimmi tunngaveqalertussaapput, Randi Vestergaard Evaldsen isumassarsiamut, aningaasanut inatsimmut isumaqatiginninniarnermi novembarimi 2018-imi isumassarsiarineqartumut tunngatillugu nassuiaavoq.
10 milliuunit koruunit immeraassutigalugit
Aningaasanut inatsit 2019-imeertoq naammassilermat paasinarsisimavoq 2020-imi 10 milliuunit koruunit amigaataassasut. Taamaammat isumaqatigiissutigineqarpoq Namminersorlutik Oqartussanit ingerlanneqartoq KNI 2020-imi ukiut siuliinut sanilliullugu nunatta karsianut 10 milliuunit koruuninik nanertuinerussanngitsoq. KNI pillugu isumaqatigiissut 2021-imi atorunnaassaaq.
Aningaasanut inatsimmi aningaasanut missingersuutit aaqqinneranni ima oqaaseqaateqartoqarpoq:
- Isumaqatigiissutip nutarternerani eqqarsaatigineqarpoq KNI A/S periarfissinneqassasoq nioqqutiminik illoqarfinnut allanut tunisisinnaalernissaanut, suliffeqarfik taamaasilluni suliaqartunut allanut unammillersinnaatilerlugu.
Sakkortuumik mianersoqqusineq
Sermitsiaq.AG-p saqqummiummagu inuussutissarsiornermut naalakkersuisoqarfik suliaqartussanngorlugu Naalakkersuisut aalajangertut, Sulisitsisut sakkortuumik mianersoqqussuteqarput.
- Namminersorlutik Oqartussat inuussutissarsiornerup iluani unammillernissaminnut tunuarsimaarnissaaq, aningaasaleerusuttut qanoq ilillutik tatigisinnaavaat? Tamannalu ersarilluartumik suliarineqarnissaa tatigisinnaavarput, ingerlatsiviup pisortaa Brian Buus Pedersen aperaaq. Taassuma ilanngullugu tikkuarpaa suliani allani – aatsitassarsiornermi takornariaqarnermilu – nunanit allanit aningaasaliisussanik ujartuisoqarmat.
Isumassarsiatsialak isumassarsialaanngitsorlu
Randi Vestergaard Evaldsenip paasisinnaavaa KNI-p pisortaa Peter Grønvold Samuelsen illoqarfinni annerni tallimani pilersitserusulluni kissaateqarmat.
- KNI-mut tamanna isumassarsiatsialaassaaq, niuerneq eqqarsaatigalugu. Inuiaqatigiinnulli isumassarsiatsialaanngilaq, erseqqissaavoq.