Aaja: Politiit akissarsiaat maanna qanoq iliuuseqarfigineqartariaqalerput
Politiit pineqaatissinneqarsimasullu inissiisarfianni betjentit akissarsiaasa Danmarkimi Kalaallit Nunaannilu assigiisinneqalernissaat anguniarlugu, IA-p folketingimi ilaasortaatitaa kimigiiserpoq
Politiit pineqaatissinneqarsimasullu inissiisarfianni betjentit akissarsiaasa Danmarkimi Kalaallit Nunaannilu naligiissilerneqarnissaat suli piviusunngunngilaq.
Akissarsiat nikingarneri pillugit qulaajaasussamik, suleqatigiissitamik 2017 naalersoq pilersitsisoqarpoq. Pilersaarutit malillugit suliaq siorna naammassereersimasussaagaluarpoq. Siornatigulli oqaluttuareriikkatsitut, suliaq suli paamaarunneqarpoq, inatsisinillu atuutsitsinermut ministeeriaqarfiup kingullermik nalunaarutigaa, ukiup nutaap aallartilaarnerani qulaajaaneq naammassissasoq.
- Paamaarunneqartutut isikkoqarpoq, Aaja Chemnitz Larsen (IA) oqarpoq.
Politiit eqqarsaatigalugit, Danmarkimi akissarsiat Kalaallit Nunaannilu akissarsiat qaammammut tuusintilinnik arlalinnik nikingapput.
- Danmarkimut sanilliutissagutta, Kalaallit Nunaanni 34-riaammik amerlanerusunik inunnut navialersitsisunik pinerluttoqarneruvugut. Politiigulli Danmarkimi suleqatiminnut sanilliullutik akissarsiakinnerupput. Naapertuilluannginneruvoq ersarissoq, takuinnarlugu aammali sulinermi atugassarisat eqqarsaatigalugit. Sulisussarsiorneq sulisunillu attassiniarneq tamassuma ajornarnerulersippaa, tamannalu pisariaqartinngilarput, Aaja Chemnitz Larsen (IA) isumaqarpoq.
- Suliassat oqartussanut allanut nuussigit
Taassuma saniatigut isumaqarpoq politiit allatut atorluarneqarnerusinnaasut, ulluinnarni suliarisartagaat, soorlu biilinik nalunaarsuinerit, pasinik tunniussinerit ataatassarsiuussinerillu kommunip sullissivianut nuunneqarsinnaasuuppata.
- Pasinik tunniussinerit, biilit nalunaarsornerini allaffissornerit ataatassarsiuussinerillu amerlanerpaartaat oqartussani allani siunissami suliarineqarsinnaapput. Suliat taamaattut politiinit peerneqarsinnaagaluarput, politiillu suliassaat allat, soorlu innuttaasunik politiinik pisariaqartitsisunik ikiuineq, inuttassaqarnerulissagaluarput. Isumaqarpunga tamanna salliutittariaqaripput.