Henning Sloth Pedersen eqqissilluni toquvoq
Nakorsaasimasoq Henning Sloth Pedersen toqukkut qimaguppoq.
Henning Sloth Pedersen ullaaq manna eqqissilluni toquvoq, nunap immikkoortuani Dronning Ingridip Napparsimmaviani nakorsaq Gert Mulvad ilisimatitsivoq, taanna ilaqutaasunut misiginneqatiginnippoq.
Henning Sloth Pedersen 1979-imi Qaarsuni timelæreritut sulinissani siunnerfigalugu tikeqqaarpoq, tassaniinninnilu oqaatsivut kulturerpullu ilikkarpai. Nunatsinni inuunermi sinnera suliaqarnissaanut tamanna aallarniutaavoq.
Nakorsatut ilinniarnini naammassiartorlugu Danmarkimut uterpoq, kingornalu Nunatsinnut uteqqilluni, tamanaani peqqinnissaqarfimmi sulivoq.
Nersornaat sølviusoq pissarsiarigaa
Juunip 22-anni 2018-imi taassuma Nersornaat sølviusoq ukiorpassuarni Nunatsinni nakorsatut atorfeqarnerminut atatillugu pissarsiaraa.
Tamatumunnga atatillugu Inatsisartut siulittaasuat Hans Enoksen ima oqaaseqarpoq:
- Århusip universitetiani inuiaqatigiit peqqissusiannut tunngasunik ilisimatusarfimmi lektoritut ilinniartitsisuusimavutit, ilisimatuussutsikkut misissuisarnikkut taamatut suliaqartartut akornanni akuerineqarlutit ataqqineqalersimallutit, taamatullu aamma ilisimatuussutsimut tunngasunik atuagassiani nunat tamalaat akornanni tutsuigineqartuni allaaserisarpassuaqarsimallutit. Taamaalillutit nunarsuatsinni ilisimatuut akornanni nunatta ilisimaneqarnerulerneranut toqqammavisseeqataasimavutit.
Siunnersuisartoq kajumissaarisorlu Dronning Ingridip Napparsimmaviani nakorsaq Gert Mulvad ima allappoq.
- Dronning Ingridip Napparsimmaviani suleqatiminut siunnersuisartuusimavoq kajumissaasuusimallunilu. Nuummi sinerissamilu innuttaasunut nakorsaasimavoq nakorsianut ataasiakkaannut pisariaqartitaannullu paasinnillaqqissoq.