Politiinut unnerluutiginninneq: Allagaq oqaatigeqqusaanngitsoq Facebookimi ivertinneqartoq
Kim Kielsenip aamma Lars Løkke Rasmussenip akornanni isumaqatigiissutaannut allagaq missingiut oqaatigeqqusaanngitsoq Facebookimi ivertinneqarpoq. Namminersorlutik Oqartussat suliaq politiinut unnerluutigaat.
Naalakkersuisut siulittaasuata naalakkersuisoqarfia atorfeqarnermi nipangiussisussaassusermik unioqqutitsinermut politiinut unnerluussuteqarpoq.
Naalakkersuisoqarfiup tamanna Sermitsiaq.AG-mut uppernarsarpaa.
Danmarkip Nunattalu mittarfiliortiternissamut isumaqatigiissutaata atsiorneqarnerata aqaguani isumaqatigiissummut missingiutip saqqummiunneqartussaanngitsup assitaa Facebookimi saqqummerpoq.
- Naalakkersuisut siulittaasuata naalakkersuisoqarfiata septembarip 11-anni malugilerpaa, Naalakkersuisunut allagaq saqqummiunneqartussaanngitsup ilaata assilinera Facebookimi saqqummiunneqarsimasoq, apeqquteqarninni ilisimatitsissutigisinnaavara. Allagaq Naalakkersuisut aamma ministeriunerup septembarip 10-anni mittarfinnut aningaasaliinernut inuussutissarsiornikkullu suleqatigiinnikkut isumaqatigiissutaannut aallarniutitut suliaavoq, Sermitsiaq.AG-p allakkat assilineqarsimasut takunerisa kingorna naalakkersuisoqarfimmit akissummi tamanna oqaatigineqarpoq.
- Taamatut assiliilluni saqqummiussineq naalakkersuisoqarfiup paasinninnera naapertorlugu atorfimmut atatillugu nipangiussisussaatitaanermut pinerluttulerinermi inatsisip aalajangersagaanik unioqqutitsinerummat, naalakkersuisoqarfiup suliaq politiinut nalunaarutigaa, politiillu suliaq pinerluttoqarneratut misissussagaat piumasaralugu.
Politiinut unnerluutiginninneq Namminersorlutik Oqartussani sulisumut aalajangersimasumut tunnganersoq, naalakkersuisoqarfiup ilisimatitsissutigerusunngilaa.
- Suliaq maanna politiinut ingerlateqqinneqarmat Naalakkersuisup siulittaasuata naalakkersuisoqarfiata politiit sulinerat utaqqivaat. Tamanna tunuliaqutigalugu naalakkersuisoqarfik suliaq pillugu allamik ilanngussassaqanngilaq.