Kangerlussuup siunissaa kingulliullugu aalajangiunneqassaaq

Qaqortumi, Nuummi Ilulissanilu mittarfinnik nutaanik sanasoqassanersoq inissinneqareerpat Kangerlussuup siunissaa isummerfigineqassaaq

Qeqqata Kommuniani innuttaasut aalajangiisoqarnissaa utaqqimaartariaqassavaat. Kangerlussuup mittarfittut ataannarnissaanut aalajangiinissaq suli ungasippoq.

Angallannermut naalakkersuisoq Simon Simonsen tusagassiutinut nalunaarummi ilisimatitsivoq.

- Naggasiutigalugu erseqqissaatigissavara, siunissami mittarfiit ilusissaanni nutaami Kangerlussuup siunissaa pillugu suli aalajangiisoqanngimmat – tamanna politikkikkut aalajangiinerusussaavoq, kingusinnerusukkut Qaqortumi, Nuummi Ilulissanilu mittarfinnik nutaanik sanasoqassanersoq inissinneqareerpat isummerfigineqartussaalluni, Simon Simonsen naqissusiivoq.

Aningaasartuutit saniatigut aningaasaliinerit
Mittarfiliortiternissamut - Kangerlussuaq ilanngullugu - innuttaasunut qanoq akeqassanersoq taamaattumik ilisimaneqassanngilaq.

Timmisartornikkut angallannerup nutarterneqarnissaanut atatillugu Kangerlussuaq heliportitut imaluunniit suluusalinnut mittarfilinnut atuunnarneqassanersoq aalajangiiffigineqartussaavoq. Mittarfiliornissat 3,6 milliard koruuneqassangatinneqartut saniatigut aningaasat millionilikkaanik amerlatigisut atorneqassapput.

Simon Simonsen taama nalunaaruteqarpoq Air Greelandip ernumagimmagu Kangerlussuaq kisimi heliportitut atorneqassasoq, taamaassappammi suluusalinnut mittarfittut atorneqarsinnaajunnaassammat.

- Kangerlussuarmut piffissamik eqquisinnaaneq qaffasissorujussuummat ilumoorpoq, 99,8 procentiulluni, taamaattumillu mittarfittut sillimmatitut naleqquttorujussuulluni, Simon Simonsenip nassuerutigaa.

Teknologi nutaaliaasoq
Air Greenlandip pisortaanera Jacob Nitter Sørensenip oqariartuutigereerpaa , imarpik qulaallugu timmisartunut mittarfiit marluk nutaat sananeqassappata, nunap iluani timmisartuussinerit 43 procentimik annikillisussaasut.

- Nuummi Ilulissanilu mittarfinnik tannerusunik sanasoqarpat, illoqarfiit mittarfeqarfiusut ullumikkornit pitsaanerujussuarmik piffissamik eqquiffiusinnaalissasut naatsorsukkat takutippaat, tassalu 95,1 aamma 98,1 procentit. Tamatumunnga ilaatigut teknologiit nutaaliaasut atorneqartussaanerat peqqutaavoq, taamaalillunilu timmisartut ullumikkornit akulikinnerusumik missinnaalertussaapput, silap anorillu qanoq innerisa apeqqutaanerat annikinnerulertussaammat, Simon Simonsen oqarpoq.

Powered by Labrador CMS