ICC Alaskami siulittaasoq: Kissaatigigaluarpara uagut aamma namminiilivinnissaq oqaluuserissagipput
Ukioq manna ICC-p ataatsimeersuarnerani qaaqqusisuusoq, kalaaliorusulluni oqarpoq.
Jim Stotts ICC-mi misilittagartuut ilagaat. Ullumikkullu ICC Alaskami siulittaasuuvoq, kisianni 1980-ikkunnili Alaskap siulittaasuuffeqarnerani siullermi sinniisuvoq.
1990-ikkut aallartinneranni ICC-p avatangiisinut suliniutaanni ataqatigiissaarisutut Nuummi sulivoq.
- Peroriartorninni kalaaliorusullunga oqartuaannarpungam Jim Stotts ICC General Assemblymi Alaskami Utqiaġvikimi tikilluaqqusinermini oqarpoq.
- Suli kalaaliorusuppunga, ilanngullugu oqarpoq.
Jim Stotts aamma inersimasunngoreerluni kalaaliorusunnera, kalaallit namminiilivinnissamik anguniagaqarnerannik ilaatigut pissuteqarpoq.
Tassami oqalugiarnera sioqqutilaarlugu nunanut allanut tunngasunut naalakkersuisup, Vivian Motzfeldtip (S) nammineq nunaqalernissaq anguniarneqartoq paasissutissiissutigaa.
- Tamanna apeqqut Hans-Pavialu (Rosing) oqaluuserisarnikuuarput, taanna ICC-mi siulittaasuusimasumut toqoqqammersumut unnersuussilluni oqarpoq.
- Kissaatigisaraluarpara maani Alaskami taamatut oqaluuserinnittarnissarput, malunnartumik Jim Stotts attortisimasoq oqarpoq.
- Ajoraluartumik oqaluuserinninnerput taama nukittutiginngilaq, tamanna kissaatigigaluarpara.