Dorisip Arsummi innuttaasut naapeqatigai

Peqqissutsimut naalakkersuisup, Doris J. Jensenip (S), nunaqarfik Arsuk tikeraaqqammerpaa, tassani peqqinnissaqarfimmik, kommunimik politiinillu pitsaanerusumik suleqateqarnissaq ilaatigut eqqartorneqarpoq.

Naalakkersuisup Doris J. Jensenip nunaqarfimmi Arsummi nakorsiartarfik alakkarpaa. Uani takuneqarsinnaavoq Doris J. Jensenip nakorsiartarfimmi sulisoq Dorthe Mikaelsen aamma naalakkersuisoqarfimmi pisortaq Tine Pars ilagigai.

Arsuk Kommuneqarfik Sermersuup ataaniippoq, nunaqarfik avinngarusimasoq peqqissutsikkut sullinneqarnermut tunngatillugu Nunap Immikkoortuanut Kujallermut atavoq, kigutinik isumaginninnermut tunngatillugu Paamiut ataaniilluni politeeqarnermullu tunngatillugu Sermersuup ataaniilluni.

Namminersorlutik Oqartussat tusagassiuutinut nalunaarummi taama ilisimatitsipput.

Pitsaanerusumik suleqatigiinnissamut aaqqissuussinissamullu neriorsuisoq

Peqqissutsimut Ilisimatusarnermullu Naalakkersuisup Doris J. Jensenip nunaqarfimmi aqutsisut neriorsorpai susassaqarfiit taakkartorneqartut pitsaanerusumik suleqatigiinnissaq ataqatigiissaarinissarlu pillugit oqaloqatiginiarlugit.

- Nunaqarfimmi aqutsisut aamma Arsummi pinartoqartillugu upalungaarsimaneq pillugu apeqquteqarput tamannalu pillugu annerusumik paasitinneqarnissartik kissaatigalugu. Isumaqatigiissutigineqarpoq peqqinnissaqarfik nunaqarfimmilu aqutsisut attaveqaqatigiinnermut pilersaarusiorneq pillugu suleqatigiissasut. Aamma isumaqatigiissutigineqarpoq peqqinnissaqarfik tulliani nunaqarfimmut tikeraaruni soqutiginnittunut tamanut ikiueqqaarneq pillugu pikkorissartitsissasoq, Doris J. Jensen ilisimatitsivoq.

Innuttaasunik ataatsimiisitsinermi pingasunngornikkut unnukkut juulip ulluani siallerlunilu anorleraluartoq innuttaasut 22 peqataapput.

Pilertortumik nakorsanit ikiorneqarsinnaajunnaartut

Innuttaasut nuannaarutigaat Naalakkersuisoq innuttaasunut, peqqissutsikkut sullinneqarneq pillugu apeqqutissarpassuaqartunut, tusarnaarusummat. Kangilinnguini Issittumi Sakkutooqarfiup matunerata kingorna nunaqarfik pisarnertut pilertortumik nakorsanit ikiorneqarsinnaajunnaarpoq.

Innuttaasut ataatsimiisinneqarneranni sammisat eqqartorneqartut ilaat tassaapput nunaqarfimmi peqqissutsikkut ikiuisut piginnaasaat, nunatsinni pujortartartorpassuit ikilisarnissaannut iliuuserineqarsinnaasut, peqqinnissaqarfimmut saaffiginninnermi pimoorunneqarnissaq kiisalu akulikinnerusumik kigutit nakorsaannit misissortinnissamik kissaateqarneq.

Assigiinngitsutigut tatineqartoq

- Peqqinnissaqarfik assigiinngitsutigut tatineqarpoq. Arsuk aamma nunaqarfippassuit isorliunerusullu allat pingaartumik peqqissutsikkut sullissisunik sulisussarsiornermut tunngatillugu unammillerneqarput. Peqqinnissaqarfik sulisussarsiornermik pitsanngorsaanissamik pilersaarusiorluni aallartippoq, neriuppungalu tamanna nunap immikkoortuini tamani sulisussarsiornermut tunngatillugu ajornartorsiuterujussuarmut iluaqutaassasoq, Doris J. Jensen, tusagassiuutinut nalunaarut naapertorlugu oqarpoq.

- Nunaqarfimmi sullissinermi inuit pinngitsuugassaanngitsut isumalluutaapput pingaarutillit, nunaqarfimmilu sulisunut iluaqutaasumik ineriartortinneqarnissaat qilanaarivara.
Aamma oqarusuppunga innuttaasutut peqqinnissaqarfimmi sulisunik attaveqarnissamut piareersimalluarnissaq pingaaruteqartoq, taamaalilluni takussutissaasinnaasut pillugit oqaluttuartoqarneratigut sulisut pitsaanerpaamik ikiuinissamut periarfissaqarniassammata.

Naalakkersuisup aamma erseqqissarpaa nappaatit amerlasuut peqqinnerusumik inooriaaseqarnikkut pinngitsoortinneqarsinnaanerisa pingaaruteqassusia.

Powered by Labrador CMS