Herstedvesterimit qanoq amerlatigisut nuunnissaat inatsisip aalajangissavaa
Inissinneqarsimasut inissiisarfimmut nutaamut nuukkusunnersut Kalaallit Nunaannut nuunneqarnissamut inatsit Pinerluttunik Isumaginnittut utaqqivaat
Inissiisarfik nutaaq aappaagu ammarpat Herstedvesterimit nuunniartut tallimanit amerlanerunissaat ilimanarpoq. Kalaallit Nunaanni Pinerluttunut Isumaginnittoqarfimmi pisortaq, Naaja Nathanielsen taama naliliivoq.
- Maanna tallimat qularnanngitsumik nuunniartut nalunaarfigineqareerpugut, kisianni pineqaatissinneqarsimasut toqqaannartumik aperinissaannut suli periarfissaqarnikuunngilagut, Naaja Nathanielsen oqarpoq.
Pinerluttunut Isumaginnittoqarfiummi inatsit utaqqivaa, taassuma Kalaallit Nunaannut nuussinissamut piumasaqaatit nassuiaasertussaavaa. Folketingimi inatsit ukioq manna oktobarimi suliarineqarnissaa naatsorsuutigineqarpoq.
- Piumasaqaatit suunersut oqaatigeqqissaartinnagit, pinerluuteqarsimasut ornillugit Nunatsinnut nuukkusunnersut toqqaannartumik aperisinnaanngilagut. Tamanna tulluarunnanngilaq.
Utertitsisinnaaneq
Tassami inissinneqarsimasunit 27-nit qanoq amerlatigisut inissiisarfittaamut nuukkusunerannut inatsimmi qanoq allaqqasoqarnera aalajangiisuulluinnarsinnaavoq.
Amerlasuut uternissaminnut periarfissaqarneq pingaaruteqarsinnaavoq, tassa utertitsitsinnaanermut pisinnaatitaaffimmik taagorneqartoq inatsimmut ilanngunneqassanersoq apeqqutaalluni. Taanna justitsministeriap siunnersuutaani ilanngunneqanngilaq, kisianni Inatsisartut isumaliutersuutiminni allannikuuaat, kalaallit tungaannit tamanna kissaatigineqartoq.
- Uteqqinnissamut pisinnaatitaaffiup malunnaatilimmik amerlatsissagai nalilerpara, Naaja Nathanielsen oqarpoq.
Tamatumami inissinneqartut Herstedvesteri sungiusimasartik qimannissaanut isumannaatsuutissavaa.
Aamma tarnimikkut imaluunniit nakorsaatitigut katsorsartinnertik ingerlassinnaaneranut periarfissaq, ataasiakkaat nuunnissamut angersinnaanerannut imaluunniit naaggaarsinnaanerannulluunnii aalajangiisuusinnaavoq.
Amerlassusaat 2019-ip aallartinnerani paasineqassasut
Inatsit pilersaarutaasutut Folketingimi suliarineqassappat, taava Naaja Nathanielsenip naatsorsuutigaa, ukiup tulliata aallartinnerani amerlassusaat Pinerluttunut Isumaginnittoqarfiup paasissagai.
Kisianni tallimanit amerlanerit angernissaat naatsorsuutigigaluarlugu, taakku 27-t tamarmik nuunnavianngillat.
- Ataasiakkaat immaqa Danmarkimi sivisuumik najugaqarput, attaveqarunnaarsimallutillu. Tamatuma saniatigut ataasiakkaat aninissamut piareersarnermik ingerlataqarsinnaapput, pineqartullu tamanna naammassiniassaguniuk paasinarpoq.
Inissiisarfimmi nutaami inissat 40-uussapput. Inissat 30-iummata Herstedvesterimiittut tamarmik nuunnissaminnik aalajangiussigaluarpata inissaqarpoq.