Sinneqartoortoqaraluartoq: Pele Broberg ileqqaarniarpoq

Nunatta karsiani 2017-imi amigartoornissamik naatsorsuuteqarneq sinneqartoornermut mumisinneqarpoq

Naalakkersuisut nunatta karsiata 2017-imut naatsorsuutai akuereqqammerpai.

Ingerlatsinermut, sanaartornermut taarsigassarsititsinermut (IST-mik angusanik taaneqartartut) 204 millionit koruuninik sinneqartooruteqartut naatsorsuutit takutippaat. Missingersuutit naapertorlugit 99 millionit koruuninik amigartooruteqartoqarnissaa naatsorsuutigineqaraluarpoq.

Aalisarnermit isertitat amerlanerusut

Naatsorsuutigisami isertitat 186 millionit koruuninik amerlanerunerannik sinneqartoorneq pissuteqarpoq. Aammattaaq aningaasaliissutaasartut inatsisinut pituttorsimasut, ingammik isumaginnittoqarfiup iluaniittut, ilimagisamit annikinnerusumik aningaasartuuteqarsimammata.

- Nunatta karsiata naatsorsuutaanni maannakkut sinneqartoorutit akit appasissusiannit pissuteqarput, aningaasaqarnermut akileraartarnermullu naalakkersuisoq Pele Broberg tusagassiuutinut nalunaarummi allappoq.

Ileqqaartoqartariaqartoq

Taamaattumillu aningaasat atorneqapallattariaqanngitsut oqariartuuteqarpoq.

- Ingerlatsinermut aningaasartuutinut qimataaqqunata, akit appasissuuneri pissutaallutik aningaasarsiornikkut ingerlalluartoqartillugu pingaaruteqarpoq imminut aqulluarsinnaanissaq.

- Aningaasaqarnikkut ingerlalluarnerup nalaani akit qaffaqqinnissaannut sillimmatissatut ileqqaarisarnissaq pingaartuuvoq.

Isertitammi amerlinerat siullermik aalisakkat akiisa qaffasissimanerannik pissuteqarpoq.

- Aningaasaqarnikkut ingerlanerput suli sunnertiasuuvoq, assersuutigalugu aalisakkat isertitsissutigisartakkagut pingaarnerit eqqarsaatigalugit taakku akii allanngoratarsinnaasarput, misilittakkammi aamma takutittuaannarpaat aningaasaqarnikkut ingerlalluarneq atajuaannartuuneq ajortoq.

Aningaasaliinerit pitsaasut

- Aningaasartuutit nutaat pingaarnertut anguniagarissavaat aningaasaqarnikkut sanngiinnerusumik inissisimaffeqartut ikiorserneqartarnissaat, aningaasaliiffigisimasallu kinguneqarluartussat siuarsarneqassasut, taakkumi aqqutigalugit aningaasaqarnikkut allanik isumalluuteqannginnissarput annertusissaaq nunattalu karsia aningaasaqarnikkut qajannaatsoq tassuuna pilersissavarput.

Naalakkersuinikkullu suliaqartut 2017-imi sipaarniarsinnaagunaraluarlutik sipaarniarpallaarsimanngillat. Tassami 2016-imut sanilliullugu aningaasartuutit isertitanit amerleriarnerusimapput.

Ingerlatsinermit isertitat 185 millionit koruuninik amerleriartut, ingerlatsinermut aningaasartuutit 195 millionit koruuninik qaffariarput, ingerlatsinerinnarmut sinneqartoorutip 10 millionit koruuninik ikileriarnerinik tamanna isumaqarpoq.

Naalakkersuisut kukkunersiuisui avataaneersut Deloitte, naatsorsuutinik kukkunersiuisutut nangaassuteqanngitsumik oqaaseqaasiorsimapput.

Landskarsip 2017-imut naatsorsuutaat Inatsisartunut ukiaru ataatsimiilerpata saqqummiunneqarlutillu akuerineqassapput.

Powered by Labrador CMS