Qineqqusaarutaannaq: Ilinniarfissuarmi ilinnialernissamut piumasaqaatit apparneqassanngillat

Ilinniarfissuarmi ilinnialernissamut piumaqaatit apparneqarnissaanut Siumup siunnersuutaa tammariasaarpoq

Ilinniarfissuaq, Seminarium

Siumup qineqqusaarnerup nalaani Ilinniarfissuarmi ilinnialernissamut piumasaqaatit sukaterneqarnerannit ukioq ataaseq qaangiutiinnartoq apparneqaqqinnissaat siunnersuutigimmagu oqallinnermik pilersitsivoq.

Ilinniartitaanermut naalakkersuisuusimasup, Doris J. Jensenip (S), qinersinissaq sioqqullugu isummersuutini saqqummiupai.

Kisianni taassuma paarlattaa Vivian Motzfeldt, ilisimaneqareersutut Siumumeersuusoq, siunnersuutip piviusunngortinnissaanut pilersaaruteqanngilaq.

Ilinniartitsisunik amigaateqalernissaq ernummatigigaa

Piumasaqaatit sukaterneqarnerisa kingorna, ukioq kingulleq Ilinniarfissuarmut qinnuteqartartut ikileriarujussuarnerat, Doris J. Jensenip siunnersuuteqarneranut tunuliaqutaavoq. Taamaammallu piumasaqaatit apparneqaqqinngippata ilinniartitsisunik amigaateqalernissap annertunerulernissaa ernummatigaa.

Kisianni qinnuteqartartut amerlassusaat nikerartorujussuuvoq, taamaattumillu piumasaqaatit qaffanneqarneri pissutaanersut oqartoqarsinnaanngilaq, Vivian Motzfeldt oqarpoq.

- Taamaammat ilinnialernissamut piumasaqaatit ilinniarfimmut akuerisaasut ikilinerannut unnersuussisoqarsinnaanngilaq. Ilinnialertartut 2011-miilli 40-t aamma 60-t akornanni nikerarsimasut kisitsisit takutippaat, 2017-imi 30-iinnaat ilinnialersimallutik, taanna Sermitsiaq.AG-mut akissuteqarluni allappoq.

Piumasaqaatit apparneqarnissaannut siunnersuut Doris J. Jensenip kisimi saqqummiutinngikkaluarpaa. Partiimi siulittaasup Kim Kielsenip tamanna tapersersorpaa.

Piumasaqaat tammartoq

Kisianni naalakkersuisoqatigiinnissamut isumaqatigiissummi piumasaqaat ilaajunnaarsimavoq. Toqqaannartumillu apeqquteqarnitsinni piumasaqaatit apparneqarnissaat Naalakkersuisut politikkerinngikkaat Vivian Motzfeldt akissuteqarpoq.

- 2018-imi piumasaqaatit apparneqanngillat. Illuanik piumassutsiminnik qinnuteqaateqartut karakteriinik qaffaanissamut periarfissinneqarnissaat imaluunniit pikkorissarnikkut pitsaanerusumik angusaqartut periarfissinnissaat aalajangiunneqarpoq. Taakku eGUX-mi aalajangersimasumik malitaqarnissaat neqeroorutaavoq, taanna akissummini allappoq.

Ilinniarfissuarmi pitsaassutsip appasippallaarnera naliliinerup takutimmagu, ilinnialertussanut piumasaqaatit qaffanneqarnikuunerinut tunuliaqutaavoq. Pitsaassutsip qaffanneqarnissaanut ilinnialernissamut piumasaqaatit qaffanneqarnissaat iliuusissat ilagaat.

Ukioq manna ilinnialertussat amerlanerusut

Ukioq manna ilinnialernissamut akuerisaasut amerlassusaasa takutippaat, ilinniartut ilinniarfimmit qimarratinngitsut. 90-t qinnuteqarput, maannakkullu 59-t akuerisaagallarput. Aamma siorna qinnuteqartunit ilinnialernissamut akuerisaasut amerlanerupput, taamani 58-iinnaat qinnuteqarmata.

Piumasaqaatit apparneqarnissaannut taarsiullugu Vivian Motzfeldtip amerlanerusut ungasianit elektroniskiusumik atuartitsinikkut ilinniarnertuunngortoqarsinnaanera anguniarniarpaa.

- Nunap siammasinneratigut ilaatigut GUX-imi elektroniskmik atuartitsineq ataatsimut isigalugu inuppassuarnut, eqaatsumik elektroniskiusumik atuartitsinermut qinnuteqartunut (assersuutigalugu atorfimmut, ilaquttanut allanullu) imaluunniit nuunnissamik kissaateqanngitsunut imaluunniit nuussinngaanngitsunut periarfissiissaaq.

- Elektroniskiusumik atuartitsineq aqqutigalugu aamma faginik ataasiakkaanik ilassutinilluunniit pilersitsinissamut periarfissaqassaaq, taakku ilaatigut ilinniartut ataasiakkaat piukkunnarsarnissaannut siunertaqarlutik, taanna taamaalilluni ilinniarfiup kissaatigisami piumaqasaqaataanik naammassinnissinnaalissammat, Vivian Motzfeldt (S) akissummini allappoq.

Powered by Labrador CMS