Gaba 15-inik ukiulik sikuiuitsumut ilisimasassarsioriassaaq
15-inik ukiulik Gaba Malik Lynge Sisimiuneersoq immikkut ittumik aasaanerani atuanngiffeqarnermi misigisassaqarnissamut qilanaalereersinnaavoq, tassami WWF-ip angalatitsineranik pissarsisuuvoq, tassani inuusuttorpassuit nunanit allaneersut peqatigalugit Issittoq qanillissavaa.
Gaba Nalunnguarfiup Atuarfia 9. klassimi atuartuuvoq. Taanna Students On Icep toqqaasartuinit kalaallinit qinnuteqartunit 19-iusut akornannit toqqarneqarpoq. Maanna ulluni 15-ini ilisimasassarsiorluni angalanissamut qilanaarsinnaanngorpoq, tassani Issittumi immikkut ittunik misigisassanik ulikkaarpoq, nunarsuarmilu tamaneersut inuusuttut 100-t allat peqatigalugit angalassaaq.
- Student On Ice Instagramimi takuara, kusanartorujussuullunilu nuannerpasippoq. Pinngortitaq, uumasut, naasut aamma oqaluttuarisaanermik ilinniagaqarnissara qilanaaraara. Oqaluttuanut tusarnaaginnarnanga, kisianni aamma oqaluttuat takullugit misigalugillu. Tamanna qilanaaraara, Gaba Malik Lynge, WWF Verdensnaturfondenip tusagassiuutinut nalunaarutaa naapertorlugu taama oqarpoq.
Angalanissamut pilersaarut
- Angalaneq Ottawami, Canadami aallartissaaq, tassanngaanniillu Nunatsinnut Kangerlussuarmut ingerlaassaaq. Umiarsuaq alapernaarsuut tassanngaanniik Nunatta kitaata sineriaatigut avannamut angalassaaq. Ilulissanut aamma Uummannamut tikinnerup kingorna umiarsuup Baffinbugten ikaarlugu Nunavumi Pond Inletimut tulassaaq. Issittup imartaani angalanerup ilinniartut piujuartitsinerusumik aamma silap pissusianik mianerinninnerusumik eqqarsarsarnerulernissaannut isumassarsiorfiussasoq, WWF tusagassiuutinut nalunaarummi ilisimatitsivoq.
Gaba sunngiffimmini assiliilluartarpoq, taamaattumillu angalanini assinik aamma videolianik takusassiariniarlugu eqqarsarpoq, taakkulu Youtubemi kanalimini saqqummiuttarniarpai.