Royal Arctic Line amigartoorutinik saqqummiussivoq
Namminersorlutik Oqartussat umiarsuaatileqatigiiffia 2017-imi akileraarutit ilanngaatigereerlugit 6,6 million koruuninik amigartooruteqarpoq
Royal Arctic Line 2017-imi akileraaruteqareernerup kingorna 6,6 million koruuninik amigartooruteqarpoq, 2016-imi 97,6 million koruuninik sinneqartooruteqartoqarsimalluni.
Piginneqatigiiffik manna tikillugu kingullermik 2014-imi amigartooruteqarsimavoq 14 million koruuninik.
Namminersorlutik Oqartussat umiarsuaatileqatigiiffiutaat tusagassiuutinut nalunaarummi taama allappoq.
Ingerlatsinermilu angusassatut 15 – 25 million koruuniunissaat naatsorsuutigineqarsimasut anguneqanngillat, angusalli tassaalerlutik akileraaruteqannginnermi amigartoorutit 7,5 million koruuniusut.
Naammaginanngitsoq
Ukiumi angusat pisariaqartumik allannguinernit sunnigaapput, Royal Arctic Line allappoq.
- Angusat naammaginanngitsutut isigineqarput, naak tamanna naatsorsuutigineqarsinnaareersimagaluartoq, aporfiit annertuut pisariaqartumik allanngortiterinermik peqquteqartut aqqusaarneqartut peqqutigalugit, RAL nalunaaruteqarpoq.
Sinneqartuungaatsiarnissaq anguniagaanngitsoq
Siulersuisut siulittaasuata Kun Fenckerip tusagassiuutinut nalunaarummi oqaatigaa, umiarsuaatileqatigiiffiup annertuumik sinneqartoornissaq anguniagarinngikkaa:
- Siunnerfigaluguli inuiaqatigiit pitsaanerpaamik sullinnissaat, atortunik nutaanngilinikunik piffissaatillugu taarsersuilluni nutaanillu eqqarsarnikkut sulinermik pitsaanerusumik takutitsinissaq anguniarneqarluni aammalu siunissami aningaasartuutissat, assartuinermut angallassinermullu tunngasut iluini aqulluarniarneqarumallutik, inuiaqatigiit tamakkiisumik isigalugit iluaqutigisassaannik.
- Tassami anguniagaraarput, nunarsuup sinneranut ammarnissarput periarfissat nutaat atorsinnaalerumallugit. Taamatut siunnerfeqarneq imaannaanngitsuuvoq, kisianni upperivara suliniutigisagut nunatsinnut iluaqutaalerumaartut aamma qatanngutitsinnut meeqatsinnullu sumiikkaluarumaarnersunut. Isumannaarniarsarivarpummi periarfissanik pilersitsinissaq.
- Taamaattumik pingaartuuvoq, suliniutitsinnik ingerlatsiinnarnissarput, isumaqaramami naleqqiussagut killingusaanut qaamanerusunut aqqutissiuussiumaartut.
Siulittaasoq qinigaaqqittoq
Siulersuisut issiasut qinigaaqqipput imaalerlutik: Kuno Fencker (siulittaasoq), Erik Jørgen Østergaard, Mai-Lill Ibsen, Tanja Nielsen kiisalu Amma Knudsen.
Sulisunullu sinniisaasut Finn Lindberg aamma Aningo Broberg ukiut sisamat issiareerlutik taarserneqarput ukuusunit: Eydun Simonsen aammalu Laust Vestergaard. Jens Peter Rosing Berthelsen qinigaaqqippoq.