Naalakkersuisut toqqarniarneqarnerat sivitsortoq
Naalakkersuisut nutaat ullumikkut aamma aqqi saqqummiunneqarnavianngillat, tamannalu tupigusutsitsivoq.
Kikkut naalakkersuisuunissaat aamma ullumikkut saqqummiunneqassanngillat. Siumup allattoqarfia Sermitsiaq.AG-mut taama ilisimatitsivoq.
Qinigaanerup misilinneqarnissaanut ataatsimiitsitaliap qinigaasut Inatsisartunut ilaasortaasinnaatitaanersut misissuinera utaqqeqqaarniarlugu, Kim Kielsen KNR-imi Qanoruumut oqaatiginikuuaa.
Ataatsimiititaliaq qaqugu ataatsimiissanersoq suli tamanut nalunaarutigineqarnikuunngilaq. Kisianni Sermitsiaq.AG-p paasissutissat pissarsiarisai naapertorlugit, tamanna ullumi nalunaaqutaq 13.00 pissaaq. Taamatullu aamma ataatsimiititaliap suliat arlallit aalajangiiffigissagai oqaatigineqarpoq. Inatsisartut siulittaasuat Hans Enoksen, tassani ataatsimiititaliami siulittaasuuvoq, kisianni tamatumunnga tunngatillugu taanna Sermitsiaq.AG-p attaveqarfiginissaa ullumikkut iluatsinngilaa.
AG-p aaqqissuisuunerata Christian Schultz-Lorentzenip Siumup siulittaasuanit Kim Kielsenimit erseqqissumik nalunaaruteqartoqarnissaanik ujartuivoq.
- Naalakkersuisunut ilaasortat suli toqqarneqarsimannginnerat tupigusuutigaara. Tamanna nalinginnaanngilluinnarpoq.
- Soorunalimi suna tamarmi piffissamik atuiffiusarpoq, Kim Kielsenip aamma qinigassanngortissimasut Qinigaanerup misilinneqarnissaanut ataatsimiitsitaliamit nalilerneqarnissaanik kissaateqarnera paasisinnaavara. Tamanna isumatusaarnerusuinnaavoq.
- Kisianni maanna naalakkersuisoqatigiit pilersinneqarnerannit ullut arfinilissaat ingerlavoq. Nunarput tamarmik tallimanngormalli utaqqivoq. Saqqummiussinerup qaqugu pinissaa tamanut ammasumik nalunaarutigineqarnissaa tulluartuussaaq, taamaalilluni naalakkersuisoqatigiit iluanni ajornartorsiuteqartoqarneranik isumaliutersuuteqarnerit unitsillugit, Christian Schlutz-Lorentzen.