Naalakkersuisoqatigiit ilinniartitaaneq pillugu: Tuluit oqaasii takornartat oqaasiini sallinngortinneqassapput
Tuluit oqaasiisa danskit oqaasii takornartat oqaasiini siullertut taarserneqarnissaat, naalakkersuisoqatigiit nutaat sulissutiginiarpaat. Tamanna naalakkersuisoqatigiit isumaqatigiissutaanni ilinniartitaaneq pillugu immikkoortoq siullermi atuarneqarsinnaavoq.
Naalakkersuisoqatigiit Siumut, Partii Naleraq, Atassut aamma Nunatta Qitornai, tuluit oqaasii Nunatsinni takornartat oqaasiini siullertut inissinnissaat sulissutiginiarpaat.
- Kalaallisut oqaatsivut sallersaapput. Tuluit oqaasii takornartat oqaasiini ilinniarneqarsinnaasuni sallinngortinneqarnissaat suliarineqassaaq.
Partiit taakku sisamat naalakkersuiosoqatigiinnermut isumaqatigiissutip immikkoortumi ilinniartitaanerup ataani siullertut taama allapput.
- Nunarsuarmioqataanittalu annertusiartuinnartup oqaatsitigut eqaallisaasoqartariaqarneranik kinguneqartoq eqqarsaatigalugu, tuluit oqaasii allamiut oqaasiinit salliutinneqarlutik, meeqqat atuarfiini ilinniarneqalernissaat naalakkersuisooqatigiit anguniarpaat, naalakkersuisoqatigiit allapput.
Ilinniaqqinneq qallunaatuunerusoq
Meeqqat atuarfianni atuartitsineq ullumikkut kalaallisut ingerlanneqarnerusarpoq, meeqqat atuarfiata kingorna danskisut atuartitsineq inituneruleraluttuinnartarpoq, tassami ilinniarnertuunngorniarfinni Ilisimatusarfimmilu atuartitsineq qallunaatut ingerlanneqarnerusarmat.
- Ullumikkut atuarfinni ilinniusiortut sisamaannaapput pisariartitsinitsinnut sanilliullugu ikippallaarujussuarput, taamaammat naalakkersuisooqatigiit anguniarpaat atuarfinni ilinniarfinnilu atorneqartussanik kalaallisut oqaasertalinnik ilinniusiortut malunnaatilimmik amerlineqassasut, naalakkersuisoqatigiit ilaatigut taama allapput.
Naalakkersuisooqatigiit anguniarpaat, atuartut kalaallisut, qallunaatut tuluttullu angusaasa qaffassarnissaat. Kisianni aamma partiit anguniarpaat, atuartut kalaallisut, danskisut aamma tuluttut angusaat qaffanneqarnissaat.