Skip to main content

Aaja: Kalaallit allamiutut inissinneqarnissaat naleqqutinngitsoq

Danskisut ilinniartitaanermut akiliuteqartalernissamik kinguneqartussamik, Folketingi inatsimmik akuersinissaa naatsorsuutigineqarpoq. Inatsit kalaallinut savalimmiormiunullu atuuppoq.

Marlunngorpat 8. maj danskisut ilinniartinneqarnermut atuisutut akiliisarnermut inatsisissatut siunnersuut siullermeertumik suliarineqassaaq. Inatsisissatut siunnersuummi danskit akuutitsiniarnermut ministeriannit Inger Støjbergimit saqqummiunneqartumi allamiut qularnaveeqqummik akileeqqaartussaanerisa saniatigut danskisut ilinnialerniarnermi modulit aallartinnissaanni aamma akiliuteqartarnissaat pineqarpoq. Tamannalu kalaallinuttaaq pingaaruteqarpoq.

Tassami inatsisissatut siunnersuummi ilanngunneqarsimavoq danskisut innuttaassuseqartut ilaat ilanngunneqartut, ilaatigut kalaallit savalimmiormiullu Danmarkimi najugaqartut 18-ileereersimasut, inuiaqatigiinnilu akuunissaminni danskisut naammattumik piginnaasaqanngitsut. 

Folketingimi ilaasortap Aaja Chemnitz Larsenip inatsisissatut siunnersuummi kalaallit allamiunut naleqqiunneqarnerat isornartorsiorpaa.

- Inatsisissamut siunnersuummi kalaallit Danmarkimi najugaqartut allamiunut naleqqersuunneqarnerat qularutissaanngilaq. Kalaallit danskisut innuttaassuseqartut Danmarkimi periarfissaannik ajorseriartitsisumik inatsimmik siunnersuuteqartoqarnera assorujussuaq paasiuminaatsippara.

Danskit naalakkersuisuisa kalaallinik allamiunut naleqqersuussinerat pisatut tunngaviusuuvoq, tamannalu Aaja Chemnitz Larsenip ingerlateqqinnialersaarpaa.

- Kalaaliusutut folketingimilu ilaasortaasutut oqallinnermi akuliunnissara pingaaruteqarpoq, taamatullu ajorseriaataasussamik imaluunniit kalaallit allamiunut naleqqersuunneqarnissaannik akuersaannginnera. Tamanna kalaallit Danmarkimi najugaqartut atugaannik ajornarnerulersitsiartuaarneruvoq, minnerunngitsumik sulilernissaq siunerataralugu oqaatsitigut nukittorsaarusuttunut. Tamanna kimulluunniit pitsaasuunngilaq, aamma danskinut inuiaqatigiinnut”, folketingimi ilaasortaq oqarpoq. Inatsisissatut siunnersuut marlunngorpat folketingimi oqallisigineqassaaq. Folketingimilu ilaasortaq ministerimut apeqquteqareerpoq pineqartorlu malittarissallugu.

Inatsisissatut siunnersuut naapertorlugu FVU-mi – inersimasunut piareersaatitut atuartitsinermi – suli akeqanngitsumik danskisut ilinniartoqarsinnaavoq, kisianniliuna danskisut ilinniarnissamut periarfissat ajorseriarnerat, tunngaviusumillu isigalugu kalaallit allamiunut naleqqersuunneqarnerat folketingimi ilaasortamit isornartorsiorneqartoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER