SIK-p qineqqusaarneq pakatsissutigigaa

Jess G. Berthelsenip partiit soraarnerussutisiaqalernissamut aningaasaateqarfiup SISA-p qineqqusaarutiginninnissaat mianersoqqussutigaa

Inuppassuarnut ukiuni makkunani utimut billeteqaratik Danmarkiliartartunut SIK-p ilaasortarpassui aamma ilaapput.

Taamaattumik kattuffiup siulittaasuata Jess G. Berthelsenip sulisartut inuuniarnermikkut atugaasa marlunngornermi apriilip 24-anni qinersinissamut qineqqusaarnermi taama killeqartigisumik sammineqarnerat pakatsissutigaa. Tassami mittarfiit, aalisarnermut inatsit aamma ilaatigut namminiilivinnissaq oqallisigiumaneqarnerummata.

Aviisi Sermitsiaq taama allaaserisaqarpoq.

- Politikerit inuppassuit tamakku Nunatsinnut uternissaat siunnerfeqartumik suliniuteqarfigisariaqaraluarpaat, taakkumi atorfissaqartippavut, Jess G. Berthelsen Sermitsiamut oqarpoq.

- SIK-p isumaa naapertorlugu sunut tunngasut qineqqusaarnermi pingaartinneqarnerusariaqaraluarpat?

- Sulisartoqarnermi aaqqissuussinikkut ajornartorsiuteqarpugut, sinerissammi ilaani sulisussanik amigaateqartoqarmat, sinerissalli ilaani suliffissaaleqisorpassuaqarluni. Aalisakkanik suliffissuit Kinamiunik sulisussaminnik tikisitsisalereerput. Tamanna ilumoorsinnaanngilaq, qanorliuna iliorniartugut? Politikerit tamanna qanoq iliuuseqarfiginiarneraat paaserusukkaluarpara, Jess G. Berthelsen oqarpoq.

SISA attornagu

Qineqqusaarnermi qinigassanngortittorpassuit sulinermik inuussutissarsiuteqartut soraarnerussutisiaqalernissamut aningaasaateqarfiat SISA, 3,1 milliardit koruuninik imaqartoq isiginiartorujussuuaat.

- Soraarnerussutisiaqalernissamut aningaasaateqarfiup qineqqusaarneq suli qaangiutinngitsoq imaarunneqarnissaa ernummatigigatsigu, tassami qineqqusaartut soraarnerussutisiassatut katersavut sorpassuarnut atorniarmatigik. Politikerit paasisariaqalerpaat, sulisartut akissarsiatigut qaffaatisiassaraluaminnut taarsiullugu aningaasat utoqqalinissaminnut toqqorniarlugit aalajangersimammata. Taamaattumik aningaasat pineqartut ilaasortat aningaasaatigaat, politikerit aningaasaatiginngilaat, Jess G. Berthelsen oqarpoq, taanna aamma soraarnerussutisiaqalernissamut aningaasaateqarfimmut SISA-mut siulittaasuuvoq.

Allaaserisaq tamaat Sermitsiami saqqummertumi kingullermi atuaruk. Aviisimut isissutissamik uani ataani linki aqqutigalugu pisisinnaavutit:

Powered by Labrador CMS