Isumasiuineq: Demokraatit siuariarput
HS Analysep isumasiuinerani, ulluni apriilip 11-anit 15-annut pisumi, Demokraatit qinersinermi angusarissaassangatinneqarput aamma Siumup nunami partiit annersaattut inissisimanini annaassavaa.
Isumasiuinerup Sermitsiamut aamma KNR-imut suliarineqartup takutippaa, 2014-imi qinersinermut sanilliullugu Demokraatit saniatigut marlunnik ilaasortaatitaqalissasut, taamaalillutillu arfinilinnik Inatsisartunut ilaasortaatitaqalissasut takutippaa.
Amerlasuut nalornisut
Misissuinermi suiaassusermut, najukkamut aamma ukiunut tunngatillugu aalajangersimasoqanngilaq, kisianni peqataasut 25 procentiisa partii sorleq qinerniarnerlugu nalornillutik akissuteqarput, taakkulu qinersisartut eqimattat apriilip 24-anni qinersisoqarpat, inerneranut annertuumik sunniuteqarsinnaapput.
Siumup ilaasortaatitatik marluk annaassavaat, Inuit Ataqatigiit aamma Atassut ataatsimik annaasaqassapput, Partii Nunatta Qitornai aamma Suleqatigiissitsisut tamarmik ataatsimik ilaasortaatitaqarlutik Inatsisartunut qinigaassapput. Partii Naleqqap ilaasortaatitani pingasuusut attatiinnassavai.
Inuit Ataqatigiit saniatigut ataatsimik ilaasortaatitaqalernissaminnik qaninnerpaasut isumasiuinerup takutippaa, Suleqatigiissitsisullu Inatsisartunut ilaasortaatitaqanngitsoornissamut qaninnerpaapput.
Ilaasortat agguataarnerat
Ilaasortat agguataarneqarnerat (qinersineq nov. 2014 / assigiinngissut +/-)
- Atassut: Ilaasortaq 1 (2 / - 1)
- Demokraterne: Ilaasortat 6 (4 / +2)
- Inuit Ataqatigiit: Ilaasortat 10 (11 / - 1)
- Siumut: Ilaasortat 9 (11 / - 2)
- Partii Naleraq: Ilaasortat 3 (3 / 0)
- Partii Nunatta Qitornai: Ilaasortaq 1 (0 / +1)
- Samarbejdspartiet: Ilaasortaq 1 (0 / +1)
Nunami partiit annersaattut Inuit Ataqatigiit Siumut qaangissagaa, isumasiuinerup takutippaa. Qinersineq taamatut inerneqassappat, IA siulittaasua Sara Olsvig Naalakkersuisunik pilersitseriarnissamut pisinnaaffeqalissaaq.
HS Analysep partiit tamarmik immikkut ima maluginiarpai:
Atassut: Siuliinut sanilliullugu Nuup avataani pitsaanerusumik angusaqarpoq, inuusuttorpassuillu aamma partiimik maanna qinersisalerput.
Demokraatit: Partii Siumumit aamma Inuit Ataqatigiinnit taasinernik pissarsivoq, kisianni ingammik taasinerit amerlasuut aatsaat siullermik qinersilersunit, nuunnernit aamma qinersiartunngitsoortartunit.
Inuit Ataqatigiit: Partii ingammik Nuummi taasinernik annaasaqarpoq. Partiip kinguariannginnerunera sumiiffinnit allanit taasisartunik pissarsinermik pissuteqarpoq, taakku siornatigut Siumumik taasisarsimapput.
Partii Naleraq: Partii aalisartut piniartullu akornanni nuannarineqarneruvoq, taakku taasisartut pingajorarterutaat sinnilaarlugit pissarsiarissamaarpasippaat, tamannalu Siumumit annertunerulaarpoq.
Siumut: Siumut taasisartutoqarluarpoq, taakkunanngalu amerlasuut taasisarfimmut iserlutik taasilerunik utersinnaapput. Illuanik kinguariarneq, ingammik qineqqusaarnerup ingerlanerani pisoq ingerlaannarsinnaavoq, kinguariarnerlu annertunerulerluni.
Partii Nunatta Qitornai: Angutaanerusut partiimik taasissapput, nunaqarfinnilu taasisartoqarnerullutik.
Suleqatigiissitsisut: Partiip 2,9 procentit pissarsiarineratigut ataatsimik ilaasortaqalissapput. Taasinerit amerlanerpaartaat Nuummeersuupput, 2014-imi qinersisartunit Demokraatinik imaluunniit piffissap ingerlanerani nunasisimasunit pissarsiarineqassapput. Partiip qinersisartui tamangajammik ilinniagartuujupput.
Procentinngorlugit
Partiit taaguunneqarnerat (qinersineq nov. 2014 / assigiinngissut +/-) - procentit
Atassut: 5,2 (6,6 / - 1,4)
Demokraterne: 18,8 (11,9 / + 6,9)
Inuit Ataqatigiit: 31,0 (33,5 / - 2,5)
Partii Naleraq: 11,1 (34,7 / - 0,6)
Siumut: 27,4 (34,7 / -7,3)
Partii Nunatta Qitornai: 3,6 (0 / -+3,6)
Samarbejdspartiet: 2,9 (0 / + 2,9)