Taama ikitsigisinnaapput: 39-nit taaneqarluni qinigaasoq
Qineqqusaarneq naammassiartorpoq. Illumiit illumut taasisussat pilerngunneqarput. Mikisualuilluunniit qanoq inerneqarnissaanut aalajangiisuusinnaapput. Qineqqusaartorpassuilli ikittuinnarnit taaneqarlutik qimigaasinnaapput
Ulluni makkunani qineqqusaartut taagorluarneqarnissaminnik takorluugaqarput. Marlunngornermili amerlasoorsuarnit taaneqartariaqanngilaq.
Nuannarineqarluartumillu ilaqaraanni – imaluunniit ilaqutarpassuaqarluni – qinigaanissaq naatsorsuutigineqalereersinnaavoq.
2014-imi kingullermik Inatsisartunut qinersinermi taasinerit 29.489-iupput. Agguaqatigiissikkaanni Inatsisartunut ilaasortat 31-t tamarmik ataasiakkaarlutik 950-init taaneqassagaluarput. Ilisimaneqartutuulli qineqqusaartut ilaat allanit taagorluarneqarnerusarput. Sara Olsvig 5.829- nit taaneqarpoq; Kim Kielsen 4.608-nit.
Illuatungaaniittut
Illuatungaaniittut ilagaat ilaatigut Villy Olsvig (IA) Sisimiuneersoq. 2014-imi ukiakkut qinersinermi ajorsaraluarpoq, ukiulli marlussuit tamatuma kingorna naalak kersuisunngortitsisoqartussanngormat – IA-mit Naalakkersuisut sisamat ivertinneqarlutik – tassanngaannaq sinniisussamut Villymut 39-nit taaneqartumut Inatsisartuni inissaqalerpoq.
Tamannalu nuannaarutigeqaa:
- Pissanganarlunilu soqutiginarpoq. Neriuppunga maannakkut qinigaalluarnerussallunga, taamaalillunga pingaartitakka sulissutigeqqissinnaallugit, oqarpoq