Suliffissuaatitaarnissani takorloorpaa
Inatsisartuni ilaasortat assigiinngitsorpassuarnik ilinniarsimasuupput. Politiit, ilinniartitsisut aamma piniartut.Atoqatigiinnermulli aappariinnermullu immikkut ilisimasalimmik ilaqanngillat! Immaqa tamanna 24-ata kingornaallanngussaaq
Ulrikka Holm Qaqortumeersoq politikimik suliaqartuni arlalitsigut immikkut maluginiagassaavoq. Siumut sinnerlugu qinigassanngortittoq atoqatigiinnermut aappariinnermullu immikkut ilisimasaqarpoq, taannali aamma nammineq umiatsiaqarluni takorloorpaalu Kujataani aalisakkanik suliffissuarmik ammaasinnaanissani.
AG aviisi taama allappoq.
- Atoqatigiinnermut aappariinnermullu immikkut ilisimasalittut ingerlatsinerma saniatigut aalisarneq aamma soqutigisorujussuuara. Umiatsiaaqqamik qanittukkut piseqqammerpunga pisassinneqarnissaralu maanna utaqqiinnarlugu. Umiatsiaaraq taamaallaat 2 tonsinik usisinnaavoq. Angutit inuusuttut arlallit tassani sulisorinissaat pilersaarutigaara. Inooqatigiinnikkut suliniutitut aallaqqaammut eqqarsaataavoq. Piffissap ingerlanerani aalisakkanik suliffissuarmik aallarneeqataanissara takorloorpara, taamaalilluta nunap immikkoortuani tamaani nalilinnik amerlanerusunik pilersitseqataaniassagatta, Ulrikka Holm nassuiaavoq.
- Aalisarneq aamma atoqatigiinneq assigiinngitsorujussuit marluupput?
- Aap, uangali aalisarnermik inuussutissarsiuteqarneq nuannarisorujussuuara. Aamma allanngorartumik ingerlatsineq nuannarisaraara. Atuagarsorneq aamma sulineq, Ulrikka Holm akivoq.
Naalakkersuinermik suliaqalerniarneranut toqqaannartumik patsisaasoq tassaavoq kinguaassiuutitigut atornerlunneqarsimasunut katsorsaavimmik ilisimasanillu qitiusumik sullissivimmik pilersitsinissamik kissaatigisami naalakkersuinikkut oqallinnermi sallernut ilaatinneqalernissaa.
Apeqqarissaarneq AG aviisimi tamaat atuaruk. Aviisi uani pisiassaavoq.