Kulusummi nannunneq alianartoq
Sapaatip-akunnerata siuliani Kulusummi piniartut nanoq arnaviaq pisaraat, taanna marlunnik piaraqartoq kingorna paasinarsivoq, taakkulu anaanaqaratik uumasinnaanngimmata toqunneqartariaqarsimapput.
Aalisarnermut Piniarnermut Naalakkersuisoqarfiup nannup arnaviap piaqqallu marluk pisarineqartut arsaarinnissutigai.
Pisaqarneq marlunngornermi sapaatip-akunnerata siuliani nunaqarfimmi Kulusummi pivoq.
- Nannup arnavissap pisarineqarnerata kingorna marlunnik piaraqartoq piniartut aatsaat paasilerpaat, tamannalu uggornarluinnarpoq, arnavissat piarallik eqqissisimatinneqarmata tamanna unioqqutitsilluni pisaqarnertut nalilerneqarpoq, nannut pillugit nalunaarut malillugu arsaarinnissuteqarneq piuaannartussaavoq, Aalisarnermut Piniarnermut Naalakkersuisoqarfimmi pisortaq, Amalie A. Jessen, Sermitsiaq.AG-mut ilisimatitsivoq.
Pisat arsaarinnissutigineqarput
Uani pisumi nannup piarai qanittumiissimapput, kisianni piniartunit takuneqarsimanatik. Nanoq piaralik aallaaneqareermat aatsaat piaqqat marluk taakku piniartunit takuneqarput.
- Nannut piaraat uumanerminni ukiup aappassaat tikillugu anaanaminnik pisariaartitsisarput. Taakku piaqqat pineqartut anaanaqartinnatik uumasinnaasimanngillat, piniartullu uagut ilitsersuinitsigut toquinnartariaqarsimavaat. Piniartut, Kulusummi kommunefoged aamma Tasiilami politiit suleqatigalugit nannut pingasut arsaarinnissutigaagut, taakku neqaat sumiiffimmi pisortat suliffeqarfiinut agguaanneqarput. Amalie A. Jessen ilisimatitsivoq.
Piniartut maluginniniartassapput
Taakku nannut pingasut pisarineqarnerat taamaammat unioqqutitsilluni pisaqarnertut nalilerneqarpoq.
- Amii kukitallit, niaquisa saarngi kigutitaqartut il. il. arsaarinnissutigineqarput. Soorunami suliaq uggornarpoq, Aalisarnermut Piniarnermut Naalakkersuisoqarfiup nannut piaqqanikmalitseqarnersut piniartut pisaqarnialinnginnerminni maluginiartassagaat kajumissaarutigiuaannarpaa, Amalie A. Jessen oqarpoq.