Futsalimi kuultinnattoq: Pissartanngorniutivinneq pissaganaqaaq
Kalaallit futsalertartut U14-it Yamalimut pissartanngorniutivinnermi 0-2-mik kinguaqqasinnarlutik uterluarput. Sermitsiaq.AG-p iligiit aqutsisuat 14-nik ukiulik Nemo Thomsen sungiusaasuallu David Janussen pissartanngorniutivinnerup kingorna oqaloqatigai.
- 0-2-mik kinguaratta pissartanngorniutivinnermi ajorsassanerluta pissagaleraluarpunga.
U14-it futsalertartut aqutsisuat Nemo Thomsen pissartanngorniutivinnermi Yamalimut 3-2-mik ajugaareernerup kingorna Sermitsiaq.AG-mut taama oqarpoq.
- Unamminermili qanoq utissanersugut sungiusaasutta piareersarluarsimavaa. Periaarisia malipparput unamminitsinnilu ajugaalluta. Ataqatigiilluartupilussuuvugut unamminerlu ajugaallugu nuanneqaaq, Nemo Thomsen oqarpoq.
Sungiusaasuata David Janussenip oqaatigaa, unamminermi pissagassuteqarsimanngilluinnarluni.
- Unamminerup aallartinnginnerani soorunami unammisartut pissagapput, ingammik 0-2-mik kinguaqqanerminni. Unammisartulli unillatsiarnissaq sioqqullugu isertitsigamik qiimmaallaatigaat. Unamminerup immikkoortuata aappaanut piareersarsimavugut, iluatsilluarporlu.
- 0-2-milluunniit kinguaraluaratta unamminerimi ajorsarnissarput ernumassutiginngilara. Sungiusaasuunera tamaat unammisartuutimma unamminerni pingaarutilinni kinguaqqarsarnerat misigisarsimavara. Naggataanilu ajugaajuaannarluta, taanna illarpoq.
David Janussenip qularinngilaa, unammisartut siunissaqarluartut.
- Sakkortuumik sungiusartarnitik ingerlatiinnarsinnaappassuk siunissami pingaarutilittut inissisimalernissaat qularinngilara. Unammeqatiminniik nukittunerupput. Taamaammaat kuultinnannerput nuannaarutigeqaara, russinullu ajugaanerput, David Janussen oqarpoq.