Skip to main content

Tassaaarsuaq: Eqqorneqartut suleriutsinit eqqornerlunneqartut

Aappariit Ole aamma Laila Møller Nuugaatsiami tassaarsuaqarmat pigisatik tamaasa annaavaat. Eqqorneqartut allat assigalugit ikioqqunerminni maanna suleriutsinut aporfeqalerput

Aappariit Ole aamma Laila Møller Nuugaatsiami siorna juunip qaammataani tassaarsuaqarmat ernertik, ukuaasartik ernutartillu annaavaat. 

Ernerminnik ilaqutaanillu annaasaqarnermik saniatigut aappariit Ole aamma Laila Møllerikkut Nuugaatsiami pigisatik tamaasa annaavaat illuat tassaarsuaqarnerani imaanut amuneqartut ilagimmassuk. Aamma Ole Møllerip umiatsiaa, snescooterii piniutaalu tamarmik amuneqarput.

- Taamani Uummannamut pivugut atisat atukkavut kisiisa pigalugit, Ole Møller, nulianilu Laila Møller ulluni makkunani Ilulissaniittoq oqarpoq. Nangipporlu:

- Tamakkua malitsigisaanik soorunami inuttut makeqqinniaqqaarneq pisimavarput.

Tassaarsuaqanngitsiartoq Uummannami illusipput

Aappariit 2017-imi januaariugaa Uummannami illusipput, tassaarsuaqarnissaalu qaammammik sioqqullugu illusiartik Uummannami pisattanik atornikunik pisiortornermikkut pisatsersoruusaalerlugu.

- Kisianni tassa taamannak pisoqarnerata aqaguaguani tassunga illumut qujanartumik isiinnarsimavugut. Illu pisariaqarnernik pisatsersoreersimavarput, Ole Møller oqarpoq, nangillunilu:

- Taamani soorunami naluarput piffissami qanittumi najulernissaa allatorluinnaq siunertaqarluta illu taanna pisiarisimagaluarparput.

LÆS OGSÅ: Sara Olsvig tassaarsuarmit eqqugaasimasut oqaloqatiginissaannut aggersaavoq

Assigiimmik pineqarnissamut sorsunneq

Laila Møllerip oqaluttuaraa Uummannamut nuutsitaangamilli Illorsuarniit Nuugaatsiamiillu qaqqap sisooqqissinnaanera aarlerissutigineqarmat nuutsitaasutut allatuulli ikiorneqarnissartik sorsuutigisimallugu.

- Nuutsinneqartut allat tamarmik kommuunip inaataanut pisut nutaanik pisatartaartinneqarput. Kisiani uanga uteriiserninnit pisiavut atornikut nutaanik Røde Kors-iminngaanniit taarserneqarniikuupput. Nukinnik atuisimaqaanga, Laila Møller oqarpoq.

Kisianni aappariit suli misigisimapput allatuulli ikiorneqaratik, tassami aappariit oqarnerattut Naalakkersuisut siulittaasuata Kim Kielsenip tassaarsuaqarnerani eqqungaasunut neriorsuutigisimavaa eqqorneqartut tamarmik assigiimmik ikiorneqarumaartut.

Allat akiligassanik akiliunneqartartut

Aappariit oqarnerat naapertorlugu tassaarsuaqarnerani nunaqarfinnit nuutsitaasut allat kommuunip inaataanut pisut innaallagissamut, kiassarnermut, eqqaavinnut anartarfinnullu akiligassaminnik ulloq manna tikillugu akiliunneqartarput. Møllerikkulli akiliunneqarneq ajorput.

- Saaffiginnissutigisaartaraluarpagut. Kisianni ulloq manna kinguneqanngitsumik. Kisianni januaari qaammat akiligassat Uummannami Sullissivimmit tigujumaneqarnikuupput. Maanna qaammatit pingajussaat ingerlavoq suli paasisaqarata, Laila Møller sapaatip akunnera qaangiuttumi Qaasuitsup Kommuniata pisortaanerisimasaanut nukingisaarisimasoq oqarpoq.

Aamma atuaruk: Tassaarsuaq: Avannaata Kommunia Sara Olsvigimut: Toqqaannartumik suleqatigisigut

Qallunaatut allagarsivoq

- Hans Eriksenimit  ippassaanikkunni emailersinialillarpunga qallunaatuinnaq allaqqasumik. Uagullu qallunaatut paasinnissinnaanerput killeqarluni. Piffissaqannginnamigooq kalaallisut allannissaminut. Taava Avannaata Kommuniani nutserisoqarfianut nutsequllugit saaffiginnikkaluarpunga. Kisianni akineqarpunga kommuunimut tunngasuunngimmata nutsersinnaanngikkaat. 

Taava imannak paasisariaavoq Hans Eriksenip paasissutissaq ilinnut nassiussaa kommuuniminngaanneerani allaminngaanneertoq - nassuiaatitaqaranilu ilinnit paasineqarsinnaasumik?

- Tassa taakkua allakkat ilumullimi paasisinnaagaanni qujanassangaluarpoq. Imaaluunniimmi uagut paasisinnaannginnatsigit. Qallunaatuujummata, Laila Møller oqarpoq.

Taava  nassiuaanneqanngilasi?

- Tassa iluamik nassuiaanneqanngilagut ulloq manna tikillugu. Akissutisinissatsinnut utaqqigaluarpugut, Laila Møller oqarpoq.

Ikiorneqarsimanerminnut qujamasupput

Ole Møllerip erseqqissarpaa inersimasuunermini imminut napatittuarsimanini, taamaattumillu una pillugu pisortanut saaffiginninnissaminut tunuarsimaarsimalluni.

- Kisianniuna Naalakkersuisut siulittaasuata oqarnera: Tamassi assigiimmik sullinneqassuusi, assigiimmik pineqassuusi, taamatut ataatsimiisilluta oqarami. Taanna eqqortinneqartariaqartutut isumaqarfigigatsigu assigiinngitsumik pineqarput soorunami akuerinngikkipput, Ole Møller oqarpoq.

Laila Møllerilu ima nangippoq:

- Kisianni illuata tungaanut saatissagukku: Ila, qujanaq taama pineqarluni. Assorujuk qujaniarnarpoq taamatut tuniorarneqallaratta pisatanik allatigullu. Tamakkua assorujuk qujanarput. Kisianniuna kisiat taakkua annerigigut. Allatigut amigaateqanngilagut.

Sermitsiaq.AG-imit Avannaata Kommuniani pisortaaneq Sivso Dorph emailikkut oqarasuaatikkullu allaaserisaq pillugu sisamanngornermili oqaaseqartinniarneqaraluarpoq. Iluatsinngittumilli.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER