Namminiilivinneq: Kielsen ulluliinianngilaq
Partii namminiilivinnissaq pillugu ulluliinnianngitsoq, Siumup siulittaasuata Kim Kielsenip aalajangiusimalluinnarlugu oqaatigaa.
Siumup tusagassiortunik katersortitsinerani qinersinermi anguniagassanik saqqummiussinermi namminiilivinnissaq apeqqutigineqarmat, aasaq Siumup nuna tamakkerlugu ataatsimeersuartitsineranut unnersuussivoq.
Suliassarpassuit
- Eqqaamallugu aasaq kingulleq nuna tamakkerlugu atatsimiittut namminiilivinnissaq ullulerneqassanngitsoq aalajanerpaat, Kim Kielsen oqarpoq, nunap Danmarkimut atajunnaarnissaanut piareernissamut suliassarpassuaqartoq, taanna isumaqarpoq.
- Katataqarusunngilagut. Qaqqap qaanut tuaviinnaq qaqigutta aqqutaanilu amerlasuunik katataqarluta iluaqutaanavianngilaq, Kim Kielsenip ajornartorsiut assersuusiorfigaa.
2021 akineqanngitsoq
Taanna 2021-mi Partii Naleqqap namminiilivinnissamik oqariartuuteqarneranut oqaaseqarusunngilaq.
- Partiit allat tamatumunnga tunngatillugu oqariartuutaannut ilanngunnianngilanga. Ullumikkut ataatsimiinnerput Siumup politikkianut tunngavoq. Qinersinerup naammassinissaa utaqqisariaqarparput, Kim Kielsen oqarpoq.
Innuttaasut piareersimassapput
‘’Innuttaasut piareerpata’’ partiip namminiilivinnissamik neriorsuutini eqqortikkumaaraa, Kim Kielsenip oqaatigaa.